金手指：內銀貪字得個貧 - 孫柏文
建行爆出一單30億元人民幣爛賬，是有史以來最大貸款風險。
路透社
金手指喺5月尾寫過一篇《一場海嘯內銀改革白廢》專欄，個半月後睇返，值得回味。當時提到一位Broker朋友話，內地經濟已經爆咗，仲話內銀亂咁放貸，最終要自食其果。
好啦，家現眼報嘞，建行(939)爆出了一單30億元人民幣的爛賬，係有史以來最大的貸款風險。做銀行，講白些少，「鍾意」富貴嫌人貧，做放數佬，本金收得返仲有息賺，咁銀行分析員會死曬，因為唔使評估盈利風險。
好可惜，內地經濟形勢冇可能一下子轉好，加上中央會為了阻止經濟繼續下行，信貸會一路鬆，結果整死內銀，因為不良貸款和不良貸款比率會進一步上升。
分析員冇眼睇齊齊唱淡
建行係咪做了大「水魚」？走去跑數，跑出個大頭佛？一個水塘，咁多肥魚，個個爭食，你睇唔到其他銀行爆出禍，唔係人哋獨善其身，只係阿爺冚住或者傳媒未查到出來。要去內地網站，搵建行有壞賬呢單料，可以話部份「被河蟹」，想深入些少睇都唔得，足以證明阿爺係幾咁驚，仲要未計連鎖效應。
冇料睇，孫柏文走去問專睇金融板塊的分析員。「喂，你仲點Sell內銀股呀，現時仲有好因素咩？」「請避開內銀板塊。」佢夠膽死咁講。又話死守內銀冇用，Sell內銀只可以講高息、估值低。可惜的，NIM——淨利息收益率下跌，再加埋壞賬，不如轉去內地保險股好過。
See？好一個心死的分析員。我相信千千萬萬的內銀分析員都冇眼睇。講多一個潛在風險，係信用卡。早輪銀行覺得利率市場化勢在必行，息差只會一路收窄，走去做多些少其他業務。結果，信用卡易拉架通街都係，以前招商銀行(3968)獨大情況不再。最經典係，批核信用卡嗰種求其程度。求其張三、李四搵張身份證影印本就申請到，唔對樣、唔對身份、唔睇償還能力。可以話30秒批畀你，內地銀行界人士話，呢種隻眼開隻眼閉的情況，先至係未來爆煲重頭戲。
未來再放貸要睇餸食飯
套落美國身上，你會愰然大悟。係喎，佢哋唔儲蓄，狂碌卡，盡情消費，結果搞到一身債，最後咪走數囉。何有責任可言？現時中國銀行業就係行緊呢條舊路。你話美國窮，唔幫銀行，就咁讓雷曼死，兼深信阿爺點都撐內銀。係，中央大把錢，儲備又多，建行30億元人民幣壞賬，冇有怕，股價跌咗約3%，市值都唔見一部份。咁我問你，點解你唔願意投資落一啲國家補貼股？航空股，全盤數，有得賺嗰部份都係靠中央補貼，你會唔會擔心將來要靠補貼過活？
現時，不良貸款上升之所以引爆，主要係信貸大肆擴張。1.地方融資平台擴大；2.企業為了炒樓而放棄實業；3.融資體系錯漏百出，結果就趁住經濟下行而爆發。
要解決，冇得再消極，靠自己，所謂大個仔自己識行。對住高風險的民企，唔該你相應調高借貸利率，個底花的，息率去到20厘都得，唔好下下聽阿爺支笛，再過份注重貸款擔保，咁樣先仲有得救！
孫柏文
獨立股評人
本欄逢周二、四刊出
上一則: 好不主席：紅色教育 - 盧先亞
下一則: 曾淵滄專欄：阿爺放水樓價難跌 - 曾淵滄
~TITLE_S~金手指 - 孫柏文 2012年7月12日 舊文