陸羽仁 BLOG 2012年7月12日
大鱷也損手
2012/7/12 上午 09:44:17
網誌分類: 經濟
歐洲局面稍稍穩定。西班牙銀行業得到歐盟千億資金援助，政府承諾推出新一輪緊縮措施削赤，國債息口回落，西班牙股市反彈1.2%。意大利總理蒙蒂昨日表示，可能要求動用救助資金幫助該國降低融資成本。國際貨幣基金組織(IMF)同時警告，意大利面臨歐債危機擴散風險，令市場開始憂慮意大利可能爆鑊。歐洲股市缺乏方向，法國股市跌0.6%，德國升0.2%，英國打和。
美股方面，投資者等待聯儲局發布最近一次FOMC議息紀要。美股大部時間「平平」無奇。午後聯儲局紀要揭盅，內客也是「平平無奇」，儲局成員雖然認為要調低美國經濟增長預測，但無明顯方向提示要搞QE3。投資者睇完會議紀要，杜指半小時內跳水76點，尾市抽上，跌幅由119點收窄至49點，報12604點，連跌五日。標普500指數則能夠收復所有失地，平手離場，收市報1341點。
聯儲局的會議紀要顯示，大部份成員認為聯儲局已做好應付經濟狀況不穩的準備。至於什麼情況才算係不穩，聯儲局要出手，紀要沒有提及。算做明確一點的指標是當通脹率持續一段時間低於2%就要出手，但要低幾耐時間才出手，也沒有界定。此外，官員表示會維持超低利率水平0至0.25厘至2014年底，不過市場普遍認為低息好大可能延續至2015年。
市場原本以為上周非農就業人數增長令人大失所望，加上製造業數以及消費者信心指數都差過預期，說明美國經濟認真唔掂，期望聯儲局會做刺激經濟，結果會議紀要無指示，於是沽之哉。美股尾市反彈，主因係得益於紐約原油反彈2.3%，推動兩大油股造好，以及惠普成功接到大一筆大生意，股價抽高3%。
股市上上落落，商品市場疲弱，唔止老散唔掂，好多對沖基金都唔掂，大炒家保爾森(John Paulson)去年睇錯金市輸錢，今年則因錯估歐債危機再輸，他的旗艦基金Advantage Plus去年勁蝕50%，今年頭半年再輸18%，單是6月都蝕8%，咁輸法好易玩完。佢的黃金基金今年頭半年亦蝕23%。保爾森自己資產亦大縮水，由380億美元跌到220億。
保爾森在2007年大量押注美國次按爆煲，一炮而紅，當一舖大賺150億美元，但成功之後就無好過。分析佢輸錢的原因，基本上維持當日贏錢的爆煲思維，大力賭金市向上，因為歐債爆煲理論上會造成恐慌，令金價再上，不過金價在去年穿了1900美元的頂位後反覆回落，佢賭金升無運行。佢今年再輸除了輸黃金之外，亦輸在錯估歐債危機的後果，佢估歐債危機會不斷惡化，歐債的確有危機，但股市主要走上落市，並不是像2008年那樣的單邊大跌市，而且歐洲未出現融化性下跌，所以佢仍要輸錢。
保爾森的故事雖然未完，但有很多教訓，好多人炒股贏大錢，可能只是一時運氣賭中方向，但一時贏錢不等如永遠贏錢，贏?鷟?屭咻A賭，好多時會輸番哂俾佢。另外就是目前的市道難炒，經濟基本因素開始惡化，但政府不斷幹預，令金融市場不斷上落，走唔出一個方向，若你以衍生工具賭方向，結果只是上上落落，時間對你不利，連大炒家都賭唔贏，散戶就更難賭了。
陸羽仁
回應(6) 我想回應
陸羽仁 BLOG 舊文