中環在線：恒生一姐彩雀變熊貓 - 李華華
《新一姐熊貓戴膠錶》Rose出嚟幾次都係黑白look，大家唔好以為華華出舊相呀！梁志永攝
恒生銀行(011)前副董事長兼行政總裁柯清輝退休後，接連兩位繼任人都係阿姐，兩位恒生一姐雖然都係花甲之年，講嘢笑咪咪，但衣着打扮就有明顯分別，前一姐梁高美懿經常着到彩雀咁，現任一姐李慧敏(Rose)就鍾意熊貓色，襯曬佢中國通背景。
Rose喺滙豐做咗35年，主要睇中國區業務，兩年前退休轉做幕後軍師，今年初梁高話退休，Rose竟然要復出，空降恒生做第二位一姐。佢5月返工，噚日第一次主持恒生業績記者會。
睇排場，兩位一姐都係由五位負責唔同範疇嘅高層陪住，Rose同梁高一樣成日笑咪咪，貴氣十足。最唔同就係兩位嘅衣着打扮，梁高玩顏色玩到七彩，紫紅、彩紫、淺藍、淺綠、芥辣黃……乜色嘅套裝都着勻，仲多數帶條大大粒嘅珍珠頸鏈、手鏈或者襟針。
黑白look配膠錶
Rose就完全唔同，簡單黑色套裝內襯白色衫，手帶膠錶、佛珠(估計價值不菲)，非常平實，唔知道佢做事方式係咪都係黑同白咁呆板，但睇佢第一次主持記者會，答問題就確實比較謹慎，問極佢恒生將來點發展內地市場，佢都係話加強兩地互動，總之會越做越好雲雲。
對於股東嚟講，話事人着成點唔緊要，最緊要搞到盤生意有聲有色，話之你似彩雀定熊貓！
李華華
mailto:LiWaWa@AppleDaily.com
《舊一姐彩雀愛珍珠》梁高變化就大好多，除咗五顏六色，首飾就多數有大大粒珍珠。
上一則: 台難成離岸人幣中心
下一則: 中環在線：朱太歐遊表心迹 - 李華華
中環在線 - 李華華 舊文