唐唐遺下的價值：自訂車牌中環在線：最揚分析員周街走 - 李華華
瑞信劉紹文用咗最低消費五千蚊就執到個分析員車牌，真係抵！設計圖片
梁振英上場之日，40萬人上街發表不滿，輸咗畀CY嘅唐唐見到咁嘅場面，唔知會唔會慶幸自己唔係主角？查實，唐唐真係帶畀香港人好多歡樂，唔係話佢嗰啲捍衞核心價值係最核心嘅核心價值嘅金句，講緊係佢當年倡議自訂車牌。
唐唐04年做財爺嗰陣倡議自訂車牌計劃，等香港市民可以發揮無限創意，好似早排有人買咗個「AAV」車牌，兩行組合起嚟，似足表情符號嘅笑樣，又有人畀萬七蚊投咗個「WAKAKAKA」車牌，睇見都開心。
華華翻查自訂車牌拍賣紀錄，發現有人投咗「BANK」、「BANKER」、「CHA1RMAN」等車牌，唔知遲啲會唔會有人整番個「CE0」、「CF0」牌嚟炫耀吓呢？
李嘉誠都捧場
證券界亦有位仁兄整咗個自訂車牌，話畀全世界知佢做邊行，佢咪就係瑞信細價股揀股王劉紹文(Kenny)囉，佢架日產GTR掛住個「ANALYST」車牌，好鬼揚！睇番運輸署資料，呢個車牌08年以5000蚊底價成交，劉生家住西灣河，瑞信總部喺九龍站ICC，行開呢條路線嘅車主或司機，可以吓見唔見到呢位出位分析員。
相對嚟講，我哋嘅首富誠哥就比較低調，佢用公司(登記地址係長江中心7樓)登記咗兩個車牌CKH同LKS，應該分別代表長實(001)同李嘉誠。誠哥真係支持唐生㗎！
李華華
mailto:LiWaWa@AppleDaily.com
上一則: 國策透視：「只爭朝夕」是A股「死穴」 - 郭小民
下一則: 中環在線：西班牙行大運 - 李華華
中環在線 - 李華華 舊文