金融High Tea 2012年7月11日
金融High Tea——壞消息有餘未盡
2012年7月11日
■ 昨日重磅股中移動獨升1％，撐住大市。
中國公佈6月份出口增長11.3%，比5月的15.3％增長低，但好過市場預期的9％。進口回落一半至6.3％，顯示工業需求極疲弱。無論如何，出口增長超預算，都有助穩定市場信心。
恒指昨日高開約76點，不過內地A股好快就見頂回落，港股亦無力水，尚幸內地股市唔算太壞，上證綜指收2164點，微跌6點收場。恒指跌低咗彈番啲，收市報19396點，小跌32點，但成交買少見少，連380億都唔到。昨日黃昏去到歐洲股市升番，希望外圍會好番啲。
昨日重磅股中移動(941)獨升1％，撐住大市，而匯控(005)收市勉強頂得住，差不多持平收場。中資金融股中只有中行(3988)表現最好，逆市升0.7%。
內銀跌到關鍵位
唔好睇內銀股昨日跌唔多，跌咗咁耐，工行和招行有少少穿位感覺，建行昨日低見5.04元，都插到支持位，再跌唔係幾掂，要守到現價唔再至好，否則穿支持位就要深度探底。有內地傳媒質疑建行浙江分行向一家正處於破產的企業貸款近30億元，不過，相較建行的總貸款6萬幾億元，不良貸款也有7百多億，這30億元只能係毛毛雨而已。
內地經濟放慢，各行各業都有好多壞消息，可以話係有餘未盡，我建議大家咁睇，壞消息不是新聞，股份見壞消息唔大跌才是新聞，若出現壞消息都頂得住支持位，或許顯示股價在低位有人吸納。舉個例煤業，內地煤價跌到七個一皮，動力煤跌價的慘烈程度已超2008年，到上周三環渤海區5500大卡動力煤的綜合平均價格連跌九個星期， 累計跌了111元一噸，跌至每噸676元，按此計1斤動力煤不過0.338元人民幣，以4元一斤番茄計算，10斤煤抵不上1斤番茄。有分析指動力煤價還會跌至每噸600元。
神華強 兗煤弱
煤價跌煤股無運行好正常，兗州煤業昨日再跌2.1％，收11.34元，跌破一年低位，由此觀之還有下行空間。但煤業巨企神華(1088)昨日只跌1.4％，而且還在一個小小上升軌中行走，未曾穿位，靚仔過兗州煤好多。其實今年三月佢地公佈業績時已露端倪，兩大煤企去年業績表現有天壤之別，神華受惠收購資產，上年賺457億元人民幣，升17.6%，而兗州煤則受匯兌盈利大減影響，跌3.8%，賺89億元，如今股價走勢正反映着兩股的盈利差距。神華股價妙就妙在仲保持到一條上升軌，壞消息咁多未大插，顯示佢有啲捧場客。
鋼企樣衰啲，鞍鋼(347)上日發盈利預警，預期上半年錄得虧損19.8億人民幣，令鞍鋼和馬鋼兩隻鋼股都跌到支持位邊緣。摩通發報告指，鞍鋼首季的虧損達到18.9億元，因此上半年業績虧損是意料中事，但是現時虧損19.8億，較該行預期的11.29億虧損為多，特別是公司今年第一季有一份母企礦石合約得到修訂，本應有助提升盈利，是次盈警令人失望，鞍鋼的盈警為行業亮起警號，但鋼股股價已經反映負面因素。摩通維持鞍鋼中性評級維持「中性」，目標價由6﹒2元削至5﹒5元(鞍鋼昨跌0.9％至4.2元)，認為內地近日推動刺激經濟措施，能限制股價跌勢。
又係同一個邏輯，衰係好衰，但大家都知你衰，股價已反映，要睇吓股價守唔守到支持位，守到又會彈一彈。
陸羽仁
上一頁 下一頁
金融High Tea 舊文