金手指 - 孫柏文 2012年8月14日
金手指：搞應肚即飛後果 - 孫柏文
見呢排係業績期，會有好多管理層見分析員嘅業績發佈會，我想同大家分享一個故事。好多年前，孫柏文仲係喺股票行做證券分析員，有次去咗個業績發佈會。
當日，嗰間公司喺晏晝食飯時間公佈嘅業績遜預期，咁我就預咗喺收市後嘅發佈會上，同啲行家齊齊打鑊甘個管理層。原因當然係我哋都建議咗「強力買入」，家份業績麻麻，股價晏晝已跌超過五個百份點，如無意外，我哋唔係俾老細照肺，就係俾啲Sale屎同客抦。
分析員扮問假到暈
到業績發佈會，管理層開波講話，係咁為份業績耍太極，話有啲「一次性」因素，先搞到咁樣。管理層睇落成個太極高手，無知嘅人聽落，真係會落叠。不過我諗，到我哋分析員發問時，你仲唔露底死梗？
到發問時間，負責指揮問問題嘅交通燈公關姐姐，就揀咗個歐資大行分析員問先。佢一揀，我已覺得怪，因為平時一定揀嗰間隻手遮天嘅美資行。但個行家一開口我就知點解。佢用咗個好似好嬲又好似好失望、但又好假嘅語氣，問咗一條完全接受管理層假設嘅問題。
如果你接受管理層嘅假設，唔使問，管理層自然答得完全有理。正正好似個後生仔，一拳打落個阿叔嘅肚，拳頭啱啱感應到個肚，後生仔已即向後飛，簡稱為「應肚即飛」。
不過對於啲有常識嘅人，就會覺得問嗰個、答嗰個同揀邊個問先嗰個，全部都係想呃人。而喺財經金融業中，差不多最令人反感的，就係俾人感覺你想呃人，僅次於人哋覺得你當佢係白癡。
我心諗除非你只係接嗰條問題，之後問嘅人，冇個會留手。結果真係，個個打到佢瞓低，之後嗰日，除問第一條問題嘅嗰間行外，我哋全部都唔畀面咁降級或調低目標價。
故事教訓大家，有冇料喺呢行最終都會浮面。用啲畀人覺得你侮辱人智慧或擺到明假嘅手法，最終只會害到自己。
孫柏文
獨立股評人
本欄逢周二、四刊出
上一則: 青心直說：內地經濟有排唞 - 胡孟青
下一則: 投資的天空：本地地產股吼信和 - 張士佳
~TITLE_S~金手指 - 孫柏文 2012年8月14日 舊文