金融High Tea 2012年8月14日
金融High Tea——敢買樓唔敢買股？
2012年8月14日
暑假中段，港股靜到喊，開市無耐見咗高位，然後跟內地偏軟，但又無大跌，全日高低波幅只有151點，收報20,081點，跌54點，跌0.3%，遠好於內地1.5％的跌幅，不過港股最「突出」的還是成交量，係突出少少，只有362億，可以用拍烏蠅來形容。
新上市公司又少，成交又低，港交所(388)自然無啖好食，佢昨日雖然只跌0.1％收106.8元，但係仲有好多潛行空間，好易人升佢唔升。
老竇代仔買樓
我一直話「樓價升、地產股唔升」無乜道理，昨日和一班朋友食飯，大家都話見梁振英做特首無乜料到，蠢蠢欲動想入樓市炒番一轉，我話炒樓兩年內沽要俾SSD(特別印花稅)，而且轉身好慢，咁鍾意炒點解唔炒地產股？有人話謂股票係咁跌，買股好似好得人驚，買樓好似安全好多。
我就話如果樓市爆煲，買樓和買股一樣咁衰，但如果樓市短期內唔死，樓價再升，照計炒地產股一樣掂，無理由唔敢買股敢買樓，你話自住就另計，又或者老竇老母買樓畀個仔就另計。講炒，炒股靈活好多。話時話而家好多細碼新盤無厘頭高價都賣得去，同父母出手有關，一個蚊型單位賣500萬，老竇俾150萬首期，其餘叫個仔供樓當交租，大有人在。
特首CY星期日接受港台訪問時提到，由於香港是開放的城市，利率受美元影響，樓市很難預測，但他「不會將私人樓價拉低來遷就購買力，我們知道購買力不會一下子跳到樓價的水平，但中間的間隙，我們有工作要做。」
我聽完打個突，佢選舉時攞本簿攞埋十大武器之首摺櫈落區，講到好似要用摺櫈拍地產商個頭咁款，講到大家好天真咁期望佢上任會拉低樓價，點知而家話「不會將私人樓價拉低來遷就購買力」，吓，咁即係點呀？搞到我樓下個看更阿伯都問，CY係唔係同地產商講掂咗數呀？有無講數我唔知，這一刻CY的政策是不想打低樓價，已經畫公仔畫出腸，佢咁講完，恐怕樓價會再上。
前日講起無乜嘢賺錢好過地產公司，昨日本地地產股就發威，新地(016)是昨日升幅最大的藍籌股，收市急升3%，收105元，兼且有9.3億成交，交投活躍，是成交金額第三大的股份，相關窩輪成交急增逾一倍。新地兩個老闆受官司纒身，本來係地產股中的弱股，但昨日升到新地，係一個典型追落後的表現。
高盛睇好和黃
投咗荃灣地王的長實(001)股價同樣造好，收市升約0.9％，收報109.9元。高盛為長實投得荃灣西鐵西站「灣畔」項目計數，話項目地價每呎4,300元，若計及建築等成本每呎2,500元，再加「發水」減10%，預期平均每呎成本6,200元可回本，相比而家附近「萬景峰」的二手呎價8,100元低。若項目於2016年以8,500元開售，可提高長實明年每股資產淨值1.8元，故將目標價由134元上調至137元，維持「買入」評級。
但高盛話，長實經過近期升勢後，股價較資產淨值折讓41%，與歷史平均水平相近，反之和黃(013)股價較資產淨值折讓42%，折讓大過過去平均10%，故認為和黃較為吸引。
高盛講的道理係啱，和黃其實較平，但市場一直認為佢會受港口及歐洲業務影響，所以唔係幾敢買佢，雖然佢每次公佈業績都做到理想增長，但一日市場擔心未變，長實表現仲會好過和黃。
陸羽仁
上一頁 下一頁
金融High Tea 舊文