中環在線：珠珠有喜！ - 李華華
今年30歲嘅前新聞之花趙海珠趕上生仔熱潮，已經懷孕4個半月，預產期明年一月，應該趕得切生個龍B。
最近見到珠珠身形圓潤不少，忍唔住走埋去問佢係咪要恭喜佢，起初佢都唔認，問多兩問先肯講，原來已經有咗4個半月。佢話上兩次睇婦科照超聲波時，BB個動作都遮住咗個重要部位，所以暫時都未知BB係仔定女。
順產生Ｂ唔開刀
唔知係咪唔想有太多人關注，更加唔想有fans走去醫院探佢，珠珠死都唔肯講打算去邊間醫院生。但就諗住順產，唔選擇開刀。都啱嘅，大眾智慧都話順產嘅BB肺部發展強啲，產婦又復完得快啲，除非想擇日擇時辰，或者真係超級怕痛，否則都唔使開刀生。
趙海珠其實都無做新聞之花5、6年咁耐，佢06年尾離開無綫，過檔法國巴黎銀行做上市衍生產品部聯席董事，變成「輪後」，經常出鏡介紹窩輪產品。
佢舊年11月先至同從商嘅男友拉埋天窗，兩人好捨得使錢，請咗80位親友飛去印尼峇里舉行婚禮，未夠一年有埋BB，都幾快手。珠珠咁後生，聽聞佢老公又有家底，好似徐子淇咁生多幾個都無問題啦。
李華華
電郵：mailto:LiWaWa@AppleDaily.com
上一則: A股不濟內險股受累
下一則: 中環在線：黃德幾巨B時間啱啱好 - 李華華
中環在線 - 李華華 舊文