金融High Tea 2012年8月1日
金融High Tea——資金避險巨股
2012年8月1日
7月終於玩完，恒指全月升4.2％，實現咗「五窮六絕七翻身」的陳年老話。不過恒指都係7月最後呢4日發威，連升4日累計升咗919點，即係4.9％，若無呢幾日的升市，恒指呢個月都係原地踏步。
而家個市炒緊歐美央行出招救市，美國聯儲局由昨日起一連兩日開會，歐洲央行亦跟住開會，淡友唔敢發圍，怕央行一出招就中伏，所以大市暫時玩吓向上，惟望央行最後交到功課，否則升市好快要斬頭。昨日港股反覆向上，最終升211點，收報19796點，升幅1.1％，國指升得多啲升咗1.6％。全日成交510.31億元，終於見番個5個字頭。
內銀弱股反彈
最威水的反而係今年最衰的內銀股，昨日愈大隻愈升得多，工行(1398)升3％收4.45元，建行(939)升3.3％收5.24元，中行(3988)升1.7％收2.97元。唔好以為工行、建行好好，佢哋今年特弱，如今只係弱股反彈。
匯控(005)之前一直受涉及在墨西哥洗黑錢的問題困擾，公佈單為美國訴訟作7億美元撥備，承認最後在美國的賠償可能更多，講完被理解為坦白交代，市場反而受落，股價昨升0.6％，收報65.65元。唔知係唔係有人放料為事件減壓，英國報章報道，匯控研究對涉及事件的前高層包括前行政總裁紀勤、時任墨西哥業務總裁霍嘉治等，追究責任，甚至收回當時發放的花紅，涉及的金額700萬鎊。顯示現任管理層同前老闆劃清界線。
證券界對匯控評價傾向正面，摩根大通話，匯控第二季稅前盈利符預期，收入略差過預期，但被成本下降及撥備降低所抵銷。摩通認為匯控的資產負債表強勁，在銀行股中屬於具防守性股份，近期的問題是洗黑錢事件涉及訴訟費用有不確定性，以及收入疲弱，但仍維持其「增持」評級。
睇證券界對匯控的評價，亦睇到佢哋的心態，匯控資產負債表咁強，你要買環球銀行股，有幾多隻可揀？如果唔係受洗黑錢事件影響，匯控股價仲強，而家都唔失禮，昨日收65.65元，比今年開局的59元，升咗11.3％，跑贏恒指今年至今同期的7.4％升幅。
中移動食正條水
不過巨股中真正強股要算係中移動(941)，昨日再升1.1％，收90.95元，再創今年高位，由今年開局時的75.9元，到而家升咗19.8％，大幅拋離恒指升幅。中移動現價11.8倍歷史市盈率，以過去兩年純利每年得4、5％增長計，衰少少得10倍市盈率唔奇，升到12倍算比較高，但在咁差的市況，而且內地競爭對手仲開始在3G通話市場劈價，對盈利增長有壓力，本來唔應該跑贏大市咁多，但中移動近期係咁升，同基金大戶的避險需求有關。
中環茶友認為，你可以話中移動增長有限，但佢係一隻超級現金牛，存在銀行的現金有3300億元人仔，每年仲要再賺1200、1300億元，真係打大風落大雨都唔驚佢有事，仲派3.7厘息，資金要流出風險股，自然揀中移動泊入去避險。
今年至今資金從內銀股大量出逃，以最大隻的工行計，今年開始時是4.61元，昨日收4.38元，累跌3.4％，大大跑輸大市。芬佬驚內銀爆煲，搵中移動避險，才出現一升一跌的現象，在外資基金心定之前，恐怕這個現象短期還會繼續下去。
陸羽仁
上一頁 下一頁
金融High Tea 舊文