金融High Tea 2012年8月31日
金融High Tea——boom and bust
2012年8月31日
■昨日收市後特首梁振英公佈推出5長5短的梁十招，為樓市降溫。資料圖片
距離Jackson Hole會議愈近，市場聯儲局出招推出第三輪量化寬鬆的期望愈低，外圍股市提早作出反應，美股悶中帶軟。
到香港開市，傳出政府出招壓抑樓市，空軍再度借勢出擊，恒指連跌兩日，50天、100天線及250天牛熊分界線(19592)全告失守，國企指數更五連瀉，交投續冰封，只得424億元。
匯控(005)及建行(939)為港股跌市火車頭，合共推冧恒指61點。藍籌股近乎全軍覆沒，只有電能實業(006)逆市升1.15元，反映市場避險情緒。
結果恒指連跌兩日，收報19552，跌235點；國企指數收報9340，跌129跌幅仲大。
梁10招暫時唔算辣
樓市續有癲價成交，惹來政府出招打壓樓市，早前已因為憂慮干預呆呆哋的本地地產股隻隻捱沽。
信置(083)全年盈利跌6%，收報12.66元，跌5%，跌幅為藍籌最大；長實(001)、恒地(012)、新地(016)等藍籌全面下挫，新地仲「紅底股」不保，全日下滑3.65元，收99.15元。
市場焦點係政府出招撳樓市，消息一早有報道出街，地產股股價已經軟咗，跟住下午進一步回落。中環茶友同陸羽仁傾起點睇，大家都認為按照過去經驗，當局干預樓市，必然係起初細細力，大家唔信又升吓，政府干預又加吓力，加加吓最後就搞到冧市。
收市後特首梁振英公佈5長5短的梁十招，短期措施包括：
1.出售剩餘830個天水圍居屋天頌苑貨尾單位。
2.將青衣青綠街置安心項目全數1000個單位，轉為全部以資助形式發售，2013年初以樓花方式推出。
3.加快審批預售樓花申請，現時處理中申請涉及9000個單位。
4.今年第四季度賣地計劃加推住宅用地，將拍賣2600個私人住宅單位用地。
5.仲有就係改建或重建工廈，包括在明年中動工改建房委會的柴灣工廈，料可供應180個公屋單位，以一人及一房單位為主。市建局亦開展工廈重建先導計劃，研究重建市區舊型工廈作住宅及辦公室用途。
至於梁振英在競選時的主打政綱，提出「港人港地」，現已開展研究，同時已指示地政部門草擬法律條款，聲稱隨時可以「上馬」。
當佢無事遲早炒爆
5長5短的招數，當然係短招最惹人關心。今次推出的措施唔算好辣，不過，梁振英未做特首前，大家都覺得佢會大力整治樓市，但當佢上台後，大家又質疑佢無料到，為了回應外界的批評，政府掟出一籃子方案去降溫，如果樓市聽聽話話靜落嚟，咁就天下太平，但地產商同炒家又有無咁聽話呢？
資產市場不離boom and bust，點解？因為人係不會知足嘅，最大可能係樓價繼續升，市民繼續鬧，招數繼續出，最後搞到焦頭爛額先收手。
聽完呢套講法，茶客又贈多兩句，話樓市遲早都係會跌嘅，但炒股炒樓一萬年太久，只爭朝夕，不排除個市靜咗一排，跟住又炒過，地產股都一樣，低位會有反彈，不過，從政府出手可以睇到梁朝對樓市的容忍度去到邊度，地產股想炒過呢一輪啲高位就唔係咁容易嘞。
陸羽仁
上一頁 下一頁
金融High Tea 舊文