金融High Tea 2012年9月19日
金融High Tea——涉日股中棍
2012年9月19日
內地A股續軟，港股當然無運行，早上先升後回，不過上日表現比較差的內房股出現反彈。內地分析指內地不斷打壓樓市，令到商品房投資下降，但阿爺在增加土地供應上做得唔好，供應量將會大幅度下降，預期房價明年3月份會出現暴漲。
分析引用香港做例子，從2003年開始，只有2007年有一次提出過增加供給，可是政策沒有延續下去，剩下的年份沒有一年能增加供給，結果造成今日樓價飛升。中海外(688)及遠洋地產(3377)逆市升1%。
又有內房股伸手
龍湖地產(960) 就趁住機會配股，配售價為11.88元至12.38元，配售股份相當於現已發行股本約4.65%，集資約31億港元。配售價較今日收市價12.9元有4%至8%折讓，聯席帳簿管理人為花旗及高盛。
大市現時個別發展，升得多的要鞏固吓，跌得多的炒反彈，指數就結束兩日升勢，恒指跌56點，收報20601點，國企指數繼續跑輸恒指跌1%。大市成交縮減至508億元。
昨日是「九一八」紀念日，內地多個城市再爆反日示威，雖然不如周日示威那樣有暴力色彩，但都足夠令人擔心，雖然看不到中日開戰的可能，但釣魚台事件咁蔓延下去，會唔會影響兩地經濟？昨日內地股市再跌0.9％，拖住港股後腿，和抗日的緊張氣氛有關，內地投資界唔係擔心打仗，係擔心示威搞到失控。
過去話釣魚台示威影響公司生意，好似有啲誇張，但內地反日情緒愈來愈高漲，這種擔心慢慢變成現實，好多大型日資工廠停產，若果停好耐，會唔會影響出口？咁多人推翻或者放水燒日本車，會唔會影響日本車銷路？日本百貨公司、日本餐廳生意有無受影響？
表面睇好多涉日股股價都受影響，但未至急跌，如在內地經營崇光百貨的利福(1212)跌3.6％，生產廣州本田及廣州豐田的廣汽集團(2238)跌1.8％，在內地有大量分店的味千拉麵(538)跌0.8％，一般相信影響只是暫時性。
日系汽車銷情急跌
不過從內地汽車業朋友口中得悉，不同行業的影響不同，佢估餐廳、百貨的影響較短暫，只要風潮一過，估計消費較快回頭，但係賣日本車的行業就完全唔係呢回事。佢話，一幕幕放火燒車的畫面，驚心動魄，試想你二十幾萬買架車，揸咗幾年，突然間俾人燒咗，真係欲哭無淚，也對買車者帶來好大心理負擔。就他所知，其中一隻日本牌子汽車最近兩星期銷量跌了兩三成，跌幅驚人，恐怕購買力不是那麼快回復過來。
佢話，過去日本系汽車的賣點主要是耗油量低和舒適性好，但近德國系汽車由於普遍運用了渦輪增壓技術，耗油量的優勢已追上日系車，而在內地用家心中，德系汽車有品牌溢價，所以早已對日系車構成威脅。如今買日系車既給人「不愛國」的印象，更怕那一天泊在街被示威者燒了，在「避險」心態下，更令日系車添壓。
由此估計，涉日股一輪殺跌後，有不少股票的生意其實影響短暫，但有某些行業如日系汽車本已積弱，如今再雪上加霜，好像廣汽集團今年中期利潤的下滑14％，本來已和旗下兩個日系合資公司業務下滑有關，如今再加一鑊，真係暫時唔掂得，佢可能比利福更值得跌多啲。
陸羽仁
上一頁 下一頁
金融High Tea 舊文