金融High Tea 2012年9月24日
金融High Tea——向債王學習
2012年9月24日
美國「無限QE」(量化寬鬆放水計劃)對全球經濟和股市的影響，暫時未見全豹，但只一露招，港股在QE後一個星期就升咗687點，升幅3.4％，係繼希臘和印度後全球第三大升幅股市，大家不可不知，同期中國股市竟然跌4％創新低，港股係畀中國拖住仍然有這個升幅。
美國聯儲局主席伯南克出到無限量QE這一招，的確出人意表，佢要每月買債400億美元，直至美國高達8.1％的失業率顯著改善為止。伯南克呢一吓好有「散戶味」，不斷加注溝淡，希望賭贏為止。
我細個時過年和阿媽玩啤牌賭「三公」(抽三隻牌鬥大的遊戲)，賭注本來好小，一舖5毛，我做莊，阿媽做閒，阿媽第一舖輸咗，點知佢出新招，第二舖加注買1元，佢再輸，第三舖加注買2元，不斷輸不斷加注，賭到第五舖，佢下注8元就贏番。我當時好唔順，既因為阿媽事先無教我呢個神奇賭術令我深深不忿，覺得阿媽財雄勢大落8元一注「恰細路哥」先至贏。
輸咗追注散戶所為
後來大個就知道阿媽呢招「大蝦細」就得，唔係乜嘢必勝賭術。傳聞有個有錢仔同而家入咗養和ICU(深切治療部)的彤叔「鋤大D」，呢個有錢仔輸咗錢就係用上述的「舖舖雙倍注」手法去賭，輸咗就加一倍注碼，結果係點？有錢仔連輸25舖至肯收手，一晚輸咗大半身家畀彤叔！
由此可見，輸咗加注，並非高手所為。伯南克見QE1、QE2唔係幾掂，再加大注碼賭QE3，以散戶手法操控全球最大的中央銀行，睇落相當「牙煙」。不過話佢唔掂，只係長線分析，掂唔掂起碼要半年一年至知。一年咁長，可炒12轉囉喎。
聯儲局出招前後，我好留意全球最大債券基金太平洋投資管理公司(PIMCO)聯席投資總監、債王格羅斯(Bill Gross)的反應，我估佢都係唱淡，但係想睇吓佢點樣唱淡。格羅斯上周四出席加州一論壇時話，伯南克推出無限QE3，係希望出現「滴流效應」，因為聯儲局期望股市上升，就買按揭證券唔買國債，逼投資公司離開國債債市，轉投較高息的按揭證券，再逼高收益投資者轉到股票市場，希望股市上升，惠及就業市場。
格羅斯認為，儲局目前根本無打算退出QE3，因為伯南克話QE3無效就會有更多措施，直至現時8.1％的失業率「顯著改善」為止，伯南克無講清楚甚麼叫「顯著改善」，佢認為美國經濟將步入通脹周期，債務危機不能單單靠印銀紙解決，美國放水只能刺激通脹多過刺激經濟。
一路批評一路入市
從QE1開始，格羅斯已經話QE救唔起美國經濟，實踐暫時證明他的分析是對的。但QE1的時候，格羅斯認為伯南克咁印銀紙唔掂，所以佢就減持美債。點知聯儲局買債的短期效果是令債券炒起，加上歐債危機令市場買美債避險，債王沽完債受到重創。
其後債王學精咗啦，一路話伯南克唔掂，一路亦朝伯南克干預的方向入貨，今次聯儲局決定無限量購買按揭證券前，格羅斯已捉到路，在上月減持三分一美國長債，並增持至近五成按揭證券，食正升浪。
格羅斯呢個故事教訓我哋，對長線經濟前景，人人都可以有睇法，但短期就唔好估啦，朝向政府干預能產生短期效果的方向去做，炒番三個月半年都好呀。唔好批評完話伯南克救唔起經濟就唔入市，或者同佢對着幹，可以一路批評，一路入市。
短期投資對抗通脹
不妨再睇睇格羅斯話有乜好炒，格羅斯假設伯南克的干預最終會失敗，救唔起經濟，所以估計「經濟差、通脹升」，你留意佢話投資實質資產，係「短線投資」，點解係短線？以物業為例，長線樓價和經濟發展掛鈎(當然也要睇購入價平貴)，若長線經濟唔掂，物業價格因為通脹上升完，最後始終都要下跌。
以格羅斯的建議，最簡單的是買抗通脹債券，在香港可以買iBond，較近期發行的政府債券一五○六(4214)，之前因為通脹回落而下降，在聯儲局宣佈QE3後反彈，若睇通脹上升可以買它。但要小心現時在市場上交易的iBond一上市就升了值，若擔心通脹無咁快升，iBond可能先調整要蝕價，可以等政府出下一隻新iBond時才買。
格羅斯講另一個投資對象係增長率高的發展中國家，我估中國都係其中一個選擇，所以儘管內地股市創緊新低，但香港H股卻唔係幾肯跟，顯示外資基金開始買緊H股。雖然而家內地經濟仲係幾差，阿爺又因為美國QE和樓價高企唔敢大放水，但估計內地經濟在第3季見底，到10月開始的第4季會回升，所以外資買入H股也是捕捉中國經濟的尋底時刻。如果唔識/唔想揀股，可以買恒生H股ETF基金(2828)，有2.4厘息，收息都可以頂得下通脹。
當然也可以「短線投資實質資產」。實質資產種類好多，最典型係和環球經濟無咁直接相關的黃金，在股市上也可以買黃金基金如價值黃金ETF(3081)，由於較接近反映金價，所以升跌幅度有限，買金礦股就不一樣了，升跌幅度有好多，風險也大好多。
實質資產包括物業，升得最多是住宅，但香港有特別印花稅，要「短線投資」唔易走，一回頭走唔切就會扮蟹，所以不如短線買入地產股好過。以折讓較大的地產股計，新世界(017)、恒基(012)、甚至我去年提過的合和(054)，近期都升唔少，如果樓價再升，這些股票仍有得炒吓。
合和息高 可以留意
若睇中線，我覺得合和好啲，佢上周五收26.85元，升2.3％，現價略高，但累計升咗咁多，都係得234億市值，現價市帳率0.74，等如股價對資產值有26％折讓，去年加埋特別息有5.2厘息率。佢在今年6月底全年純利36億，跌35％，但以不包括物業估值的核心溢利，則按年升15%至21.4億元。
合和資產豐厚，它在灣仔的王國愈來愈值錢，佢在今年7月和政府傾掂合和中心二期的補地價37億，呢塊地在合和帳上只值5億，合和擁有土地部份扣除補地價金額的估值已達41億，即係已升值36億，這一筆收益將來會在財務報表上反映出來，未來還有一個巨大發展前景。還有合和有和信置(083)各佔一半的利東街項目，合共有1300個單位，明年初就可以預售，若樓市不跌，佢未來兩年盈利都有保障。合和好肯派息，買佢都係一隻可博賺價及收息的股票。聯儲局狂印錢，谷人投資，谷高通脹，逼人投資抗通脹。而投資市場就炒半年炒升，半年炒跌，在央行出招時股市升，到央行招數用老見佢谷唔起經濟股市又回，散戶只能順勢而作。
陸羽仁
上一頁 下一頁
金融High Tea 舊文