金融High Tea 2012年9月25日
金融High Tea——趨吉避凶
2012年9月25日
昨日港股期指一開即插近200點，搞到好似帶住內地跌咁款，A股早段下潛至2005點，距離2000點大關只是一步之遙，但港股到10點左右就反彈，內地到11點跟住向番上，結果內地上證綜指收市倒升0.3％，收2033點；港股收市跌40點，造20695點，投資者抹了一把汗。成交少得嚇人，只有396億元。
本周四期指結算，估計未來幾日市況比較反覆。港股近期表現神勇，美國推QE3(第三輪量化寬)後，港股係全球反彈最勁股市排第三。內地股市就唔得啦，昨日見過的2005點又係近年新低位。唔講唔知，原來A股係今年全球主要股指中唯一下跌的股市。據統計，過去一年，內地股市不停跌，但直至8月停手前，新股還不斷推出，過去一年A股一級市場累計集資金額超5千億元，但同期二級市場蒸發市值超過5萬億元。
買了基金日日抽筋
2011年內地有6000萬股民，人均全年蝕4萬元，今年上半年，內地股民呢半年輸得更慘，人均達到約3.5萬元。股民最近編咗個順口溜：「買了浦發，白了頭髮；買了太保，三餐不保；買了人壽，愈來愈瘦；買了平安，徹夜難安；買了工商，全身是傷；買了基金，日日抽筋；買了石油，鍋裏沒油；買了石化，直接火化。」上海深圳兩市昨日成交總額只有870億元，只係旺季時的三分之一，就反映到內地投資者幾咁意興闌珊。
中環茶友話，港股有勢想上，如今只欠北風。睇嚟內地2000點未必守得住，佢反而希望內地跌得深啲狠啲，咁可以快啲見底，你睇內地股民作的順口溜就知佢哋嘈得幾厲害，個市再深跌佢哋更惡，可以逼阿爺做嘢。
睇住個市升乜跌乜，明白背後原因，可以趨吉避凶，首先要避航空股，特別係好多航線飛日本的東方航空(670)。中日兩國就釣魚島的口水戰升級，花旗出報告話，中日關係緊張對航空業影響大過航運業，而家內地有30至40%旅客取消去日本旅行，十一黃金周將至，本來係赴日旅遊旺季，如今大鑊啦，航空公司預計取消率可能會仲高，花旗估計短期中國前往日本客運或跌40至50%，各家內地航空公司中，東航及國航(753)影響最大。以東航計，日本市場佔盈利15至20%。國雖然日本市場對國航佔比較少，但若計入商務旅客，相信影響接近，對南航(1055)影響最小。
水泥當炒建材起步
花旗認為從最近貨運數據看，中日關係惡化未有對航運造成大影響，貨運水平仍正常。聽完花旗咁講，要避一避航空股，否則即使個市升，買着呢啲股人升佢唔升就無癮。
昨日升得最好係水泥股，主要源於內地證商出報告睇好水泥股，例如民生證券的建築材料行業周報就話，目前全國水泥庫存平穩，預計水泥價格的底部基本上已形成，全國水泥價格持續攀升，故給予水泥行業推薦評級。
安徽海螺(914)等水泥股受內地同業勁升帶動，昨日升4.4％，收24元，隻股早前高升後回落唔多，回到22.9元左右又彈，水泥股還是相當強勢。建材股亦跟升，中國建材(3323)升1.6％，建材股升得慢少少，但後市都睇高一線。
內地經濟差，谷基建去提振經濟無可避免，或者好似老外好諷刺咁話，內地起多十座八座鬼城，經濟就會谷起㗎啦。
陸羽仁
上一頁 下一頁
金融High Tea 舊文