金融High Tea 2012年9月5日
金融High Tea——發免費牌唔使望
2012年9月5日
■昨日有線寬頻榮登升幅榜首，午後開始大升，最高一度升43％，收市升幅略為回順，仍升29％，收報0.375元，升到嚇死人。
大市成交買少見少，昨日只得345億成交，再咁搞落去，終於要見2字頭。
十個淡市九個跌，昨日都唔例外，恒指跌129點，跌幅0.7％，內地上證綜指跌0.8％，香港和內地可謂難兄難弟囉。
昨日最惹人注目的是有線寬頻(1097)榮登升幅榜首，午後開始大升，最高一度升43％，收市升幅略為回順，仍升29％，收0.375元，升到嚇死人。電視廣播(511)一開市就插，10點未到最多插咗8.4％，然後反彈橫行，到收市都跌咗4％，以53.85元收市，以電視廣播呢隻市值230幾億的公司，一下插8％，都唔係小嘢。
有線狂升無厘頭
從時序上看是電視廣播在上午先跌，有線寬頻在下午至升，未知兩者有無關係。
有線榮登升幅榜首，各界自然尋根究柢，市場傳來傳去不外乎兩個原因，第一是行政會議昨日開會討論發出新無線廣播牌照的問題，將會發出三個新牌，有線都有一個云云。第二個傳聞是有線將會賣盤。
有線在下午兩點九透過港交所出通告，話不明股價升因，確認目前並無任何有關有意收購或變賣的商談或協議，亦不知悉有任何足以影響價格的事宜須予披露。有線出通告後，股價升幅略為放緩。
有線昨日升完市值都只係7.5億，若果真係賣盤，有個寬頻網又有個有線電視台，雖然蝕緊錢，恐怕九倉老闆吳光正都吾會咁輕易賣，真係無20億以上唔使諗，問題是有線電視市場咁難做，有無人願意出咁高價買？況且有線通告已排除傾緊賣盤，呢啲傳聞更屬一廂情願。
較易有人信的是政府會發免費電視牌，所以上晝電視廣播跌完，下晝有線就升。牌面睇政府若發三個牌，另外兩個一直傳聞會有份的城市電訊(1137)和電盈(008)都無升喎，城電老闆魔童請晒明星開晒戲，已經噴緊血，若發牌佢最受惠，昨日下晝一點幾時城電都想抽，但一抽就俾人乘機出貨，最後仲跌2.7％。另一隻相關股電盈微跌0.3％。奇就奇在只有有線大升，其餘兩隻傳聞獲發牌股無得升。
中信鐵礦累死人
陸羽仁好奇心起，打電話問吓熟悉電視業的「深喉」問吓，有傳話政府會再為發牌諮詢，但就算係都只係整吓色水，佢睇唔到有發牌的可能性，主要係上屆曾特首想發三個新免費電視牌照，阿爺唔多老嚟，新一屆梁特首亦無興趣，依家發新牌的機會真係接近零，唔知市場傳呢啲消息有乜動機。市淡成交細，有時只係古靈精怪亂咁炒。
有線昨日成交咗8744萬股，佔所有股數的4.3％，但有線大股東九倉佔股高達73.6％，昨日轉讓的股份，已佔街貨16％，一片混亂，就有六分一街貨鬆咗人，蟹貨借機逃命，真係唔知乜水放呢啲流料。散戶昨日見有線升跟風買入，真係要自求多福，望佢賣盤或私有化，好似易過佢攞到無線電視牌照。
另外中信泰富(267)好似食咗瀉藥咁，自上月23日開始一路跌，由11.2元起步，連跌兩個星期，昨日再跌4％，收8.97元，咁就唔見20％。
靠估急跌原因，是上月中公佈中期業績時，講到澳洲鐵礦項目，要再拖到年底才投產，成本要進一步上升。講起呢個投資真係好邪，當日中信泰富因為買咗個礦先至要買澳紙對沖，搞到輸鑊甘，但呢個項目未順利過，一直煩到今天，希望快啲投產令中信泰富擺脫厄運啦。
陸羽仁
上一頁 下一頁
金融High Tea 舊文