金融High Tea 2012年10月11日
金融High Tea——網絡商又到打仗時
2012年10月11日
■瑞信將數碼通目標價由18元降至15.6元。資料圖片
有消息指阿爺正準備推出「家電下鄉」及「汽車下鄉」政策刺激農村消費，成為港股昨日好消息。阿爺希望再谷大農村民間消費，以作為拉動全國經濟活力火車頭。汽車股普遍造好，其中東風(489)漲近5%，比亞迪(1211)、廣汽(2238)及吉利(175)齊升約4%。
家電下鄉政策即將於2013年1月到期，相關部委正在醞釀新一輪促消費政策。《中國證券報》披露，新消費政策可能今年底前出台，但家電下鄉補貼將側重節能環保型、中小型產品，以往的空調、冰箱、電視等大件品類或不會被納入。雖然海爾、海信、美的、格力等主流家電廠商都齊聲反對，市場預計中央唔會改變策略，由於大型家電器生產商無乜着數，股價普遍偏軟。海爾(1169)跌1.5%、TCL跌0.9%。
本來，恒指朝早低開後，跟住A股反彈，可惜兩度上衝上日收市位，但都唔成功，但係中央出招推動消費的消息下，尾市恒指企番穩，收市只微跌17點，執番身彩。國企指數表現靚仔好多，朝早已經反敗為勝，一路向上，以近全日最高位收市，成功收復萬點大關，漲74點，收報10041點。大市成交只有441億元。
瑞信降數碼通目標價
過去一兩年是本地手提電話網絡商的好年頭，由於智能手機興起，加上iPhone和三星機帶來的浪潮，令數碼通(315)和和記電訊(215)這類網絡商的股價炒住上。但瑞信發布的報告，好似當頭一棒，預示它們發展到樽頸。
瑞信話，由於智能手機逐步普及，電訊盈科(008)和中移動(941)又持續努力打入智能手機市場，令競爭環境已重返以往有4、5名全面參與者的市場，瑞信認為，這種競爭趨勢將持續，往後價格敏感的中低端市場競爭將日趨激烈，數碼通將業務重心置於高端市場，可使其每戶平均收入不至因競爭加劇惡化，但它仍然難逃競爭影響，預計數碼通付費用戶數增長將由此放緩，故將數碼通2013年上半年至2016年每股盈利預測降3至11%，將目標價由18元降至15.6元，維持「中性」評級。
昨日和電仲跌得多過數碼通，大家應該記得，早一兩年當3G電話剛興起，iPhone未流行得咁緊要時，我久不久都講吓和電和數碼通，覺得當智能電話愈來愈普及時，呢啲用戶收費較高，佢地應有運行。但隨着佢地股價愈升愈高，我就開始講少啲，因為覺得股價已充份反映公司潛質，即係無乜着數水位可走。
和電仲跌得多過數碼通，但數碼通現價仲有15.4倍市盈率，佢至6月底年度盈利增長35％，未來一年盈利有幾多增長？支唔支持到15倍市盈率？數碼通股價今年3月上高位17.5元，今年8月中和8月尾兩次再上高位咁啱只去到17.36元就行人止步，去唔番17.5元，出現一個典型大雙頂回落格局。近期大市再上高位，數碼通反彈都只係掂一掂16元又回吐，一級低過一級，股價弱勢漸成。唔係話佢絕對無可能再上穿高位，如果大市好好，佢仲有機會跟住上，但好可能會跑輸大市。
這是一個行業格局轉變，由好好景好好賺，慢慢又變番競爭較劇烈的生意，講唔定再過半年要打仗。尤記得前一陣子數碼通話要取消無限數據，但行咗一行無人跟，唯有自己轉軚，也顯示競爭加劇，想變相加價也不易。了解行業的微妙變化，可以趨吉避凶。
陸羽仁
上一頁 下一頁
金融High Tea 舊文