金融High Tea 2012年10月25日
金融High Tea——心口碎大石
2012年10月25日
■連同上周六，金管局三度向銀行體系注入過百億元資金，港元匯價仍然強勁，市場預計在QE3效應下，金管局還要繼續入市。資料圖片
呢排個市真係硬到無倫，好似昨日真係好似賣武佬咁樣心口碎大石，唔理你外圍點跌，香港個市就係頂住，你走去逆勢做淡友，真係輸到褲都唔見埋。中環茶友話，雖然無人知港股強勢可以維持幾耐，但佢升緊真係唔好去惹佢。
力撐大市的主力係本地地產股，恒生地產分類指數勁升超過2%，遠遠拋離大市，主要炒熱錢流入概念。
恒指由6月初約18500點開始反彈，昨日升了約16%，本地地產股表現最慢的新地(016)都升了三成，恆地(012)更大漲了五成。昨日再大炒特炒，新地及長實(001)係地產股中比較落後，近期升勢較凌厲，新地昨日漲3.6%至113元，長實升4.4%至119.9元，長實2700幾億市值，都可以一日升4%以上，認真犀利。結果恒指收市倒升66點收場，報21764點，連升9日，創年內新高。唔好忘記近期升得太多的國企指數仲要借勢調整，但恒指仲有得升，大市成交686億元
炒港元玩股市
港元持續強勢，金管局昨再兩度出手入市，用66.2億港元買入美元，令銀行體系結餘將增至近1600億港元。連同上周六，金管局三度向銀行體系注入過百億元資金，港元匯價仍然強勁，市場預計在QE3效應下，金管局還要繼續入市。
表面睇股市特別係地產股炒作邏輯係咁：從金管局不斷入市沽港元可知，不斷有熱錢流入香港，熱錢流入可以博港元升值，但係人都知港元短期內升值機會不大，但錢入咗來無理由放在銀行收雞碎咁多息，自然會炒樓炒股，搭熱錢順風車買吓都好合理，而炒股炒地產股更加加兩瓣齊中，更加合理。
我扮吓陰謀家分析一下，雖然對沖基金去年已打晒鑼話入來買港元，博港元升值三成，但唱到開巷，不外乎係搵多啲人信呢套理論，聚多啲人一齊炒。其實買港元機會成本好細，正常港元匯價7.77上下，即係話我港元升到7.75金管局強方保證的高位照買，過半年港元跌番落正常匯價7.77，都只係輸0.25%，即係揸1000億港元，最後輸匯價都只係輸2.5億，你睇金管局接咗100億都接到嘭嘭聲，如最後接到成1000億，你話有幾震撼？咁搞成本都只係2.5億，當廣告費都抵。若炒作者先買大量恒指，再大大聲買港元，金管局一路入市，港股一路升，最後港元雖然無脫鈎，但炒期指都可以賺3000、4000點，呢個咪就係97年對沖基金沽港元沽期指的反轉版，成本好低，好易賺錢。
水泥股健康調整
我呢啲故仔你信一成就好啦，唔好盡信。但萬一真係咁玩，第一港股在金管局不斷入市沽港元時仲有得升，唔好咁快睇淡。第二唔好見到升市以為基本因素好好，唔關基本因素事，只係順勢而炒，要睇路落車。
昨日表現好的股份除了地產股，還有中移動(941)升2%，帶動恒指升36點，佢3G上客好業績又升，仲有得炒。昨日表現比較弱的是近期大勇的建材股。龍頭安徽海螺(914)同華潤水泥(1313)跌都4%，原因係發改委公佈，今年首三季度，全國水泥產量增速同比放緩11.4個百分點，水泥價格繼續下降。水泥及建材股近期大炒特炒，潤泥在短短個多月炒高57%，這兩日借消息消化一下好正常。若大市OK，呢啲股回深啲會再炒過。
陸羽仁
上一頁 下一頁
金融High Tea 舊文