金融High Tea 2012年11月20日

金融High Tea 2012年11月20日
金融High Tea——拗腰彈
2012年11月20日
■而家電視台強弱懸殊，好多人認為政府增發免費牌，亞視必然死梗。圖為城電主席王維基。

港股昨日玩其V彈，跟住內地股市表現反覆。市場憧憬美國在解決財政懸崖問題上有進展，支持美股上周五略為反彈，但內地上證指數2000點大關一度失守，幸好收市前回穩，重要關口失而復得。

由於超過200億元人民幣市值的股份在今日解禁，滬深兩市今早低開後一直向下，上證指數午後曾跌穿兩千關，低見1995，但隨即有買盤撈底，尾市收復失地，全日更倒升收市，但深成指創下2009年3月以來新低。

中視金橋好消息爆上
上升股份中，比較特別係央視明年廣告大賣，錄158億元人民幣再創新高，做同類廣告生意的中視金橋(623)大漲9％，報3.69元，似乎好多人仲係覺得內地生意有得做。

中視金橋主要提供全國性電視廣告覆蓋及活動策劃，直接受惠內地強勁的經濟發展，去年全年純利持續保持增長近五成，主要廣告金額提升、客戶增加及聯播網的業務進入了成長期，由於與央視有密切合作等，股價趁消息爆上。

港股午後一度倒跌，但21100上有支持，收市借內地股市好番拗上升逾百點收市，恒生指數收報21262，升103點；國企指數收報10290，升47點，成交金額由上周五的474.3億元，縮減至462.5億元。

講起媒體股，壹傳媒月前宣佈出售台灣業務，賣得四十幾億元的好價錢，股價一度爆上，但交易在簽約前出現變數。

由於台灣當局介入調查，簽約要押後進行，出售資產暫時未能成事，炒佢賣盤之後派高息者，好有機會又要捱吓價。炒賣呢類股份係識得計數的高手搵錢機會，識得上車落車，可以低買高沽，相當和味，當然如果你企錯邊，隨時就左一巴、右一巴。

炒賣資產收息，上車同落車時間準確好重要，中環茶友話，好似城市電訊為咗搞免費電視出售固網，最佳上車時間係消息公佈前，到公司宣佈派高息，已經係落車黃金機會，過錯價錢就要打折扣，而家城電好多時都炒吓政府發牌，但呢個唔係真正的好消息，每次股價借呢個消息炒上，都係出貨機會。

政府發唔發免費電視牌，變成了政治事件，政府發唔發都死，好多人以為城電因為政治原因攞唔到牌，只要牌一到手就發達啦。茶友話，睇而家政府勢態，發牌肯定採取拖字訣，城電無咁快會攞到，最重要係就算攞到牌，係唔係就即刻賺到錢呢？

炒發免費牌要醒定
電視台強弱懸殊，好多人覺得政府增發免費牌，亞視必然死梗，呢個估計好有機會啱，不過亞視而家廣告似有若無，就算打低亞視，又搶到幾多廣告呢？有人話如果新電視台做得好啲，唔單止搶到亞視廣告，無綫廣告都搶到，不要忘記的是，過去三十年，曾經挑戰無綫的經營者有好多個，財力比城電雄厚好多的老闆都輸到怕唔肯再泵水。

而家城電同無綫搶人，同當年周梁淑怡係彤叔、林伯支持下燒錢挖角有何分別呢？當年周梁連無綫把聲蕭亮都搶走埋，結果係點已經寫係牆上。

當然，城電主席王維基係食腦之人，他的創意可能仲勁過周梁，所以佢攞到電視牌，可能最終會砌低無綫，但肯定呢個唔係發牌之時已經可以預見的結局。

故此炒發牌消息只可以好短癮，錯過咗當日宣佈派高息趁好價跳車的小股東，已經失去咗最佳機會，唯一慶幸係城電經營固網有成，賣盤套現跟隨多年的小股東只係賺多與賺少之別。

陸羽仁
上一頁 下一頁

金融High Tea 舊文