金融High Tea 2012年11月29日
金融High Tea——兩把懸劍
2012年11月29日
美國經濟狀況持續好轉，但仍難敵財政懸崖困擾。市傳談判出現問題，大市即刻無運行，由升轉跌，拖累埋港股，再加上內地「熊霸天下」，A股繼續尋底，兩把懸劍督住，好彩港股有新資金流入頂頂，跌幅唔大。
今日期指結算，昨日係即月期指轉倉高峰，明日則是場外衍生工具結算，預計大市較為反覆。恒指昨收市跌135點，報21708點；國企指數仲差，跌128點，報10399點。只要唔跌穿10天及20天線，後市應該可繼續睇好；唔少分析將呢個跌浪視為調整，係低吸時機。
申銀萬國表示，港股受A股拖累，恒指仍未上番22000點關口，不過睇昨日港匯再度觸及強方保證，金管局向銀行體系再注資31億元，反映繼續有資金流入，應該仍有支撐力。大市唔會跌得太多，但亦難炒上，除非美國財政懸崖談判出現新進展，A股能夠扭轉續跌勢，解下兩把懸劍。
支撐大市力量繼續來自重磅股匯控(005)及中移動(941)。大笨象無起跌；中移動逆市造好，報87.5元，微升5仙。
人保傳定價壓低保險股
人保集團(1339)明日定價，外電話擬以接近招股價下限四分之一(Lower quarter)定價，按此推算，原來招股價介乎3.42元至4.03元，即係定價應該係3.57樓下，市傳其公開發售已錄得兩倍超額認購；國際配售錄得3倍超購，反應唔算太熱。受人保吸水壓力及訂價不高影響，「5保9行」全線下跌。當中以中資保險股跌幅較顯著。國壽(2628)及平保(2318)跌超過1%；財險(2328)及新華(1336)跌2%；最差係太保(2601)跌3%。
大市雖然回落，但內房股繼續炒落後，多隻股份創出新高。早前完成資產轉移的越秀集團被市場唱好，越秀地產(123)今年股價累升接近1倍，愈戰愈勇之餘，令人猜測公司會不會有後着，玩吓財技。
快升股可能有後着
內房市場經過近3年宏調，出現汰弱留強，最近投地價開始回升，好多公司都着力增加土地儲備，越地年中把名下廣州金融中心注入房託基金，釋放近百億元財力，連月不斷買地，推動股價炒上，市場揣測公司會否再有資產轉予房託的安排。經過上一次注資，越地市值大增，吸水能力加強，但由於集資不久，假如股價再升，發股集資買地照計仲爽快。
過去越地係市級國企，係融資上無大國企咁着數，但公司因為成立咗房託基金，可以借資產轉移套現，同時保持物業控制權，財務靈活性大增，仲吸引咗市場注意力，股價借勢殺上，成為資產重組最大得益者。
另一隻升得快可能有後着的股價係太古地產(1972)，太地分拆後大股東兩度減持套現，但公司未曾集過資，最近有大行唱好公司在內地的投資，既然市場受落，太地集資順理成章，可能大行春江水暖，睇到有動作，於是搶先出手做嘢。
昨日政府宣佈兩幅官地招標結果，其中麗新發展(488)以28.26億元投得將軍澳住宅地，較預期為高，反映發展商認為未來土地供應難以增加，特別係將軍澳在地鐵貫通後，社區發展漸趨城熟。
麗展久別官地市場，這次增添土地儲備，撇除地價高低，日後可以貨如輪轉。雖然今次買入地皮不算大，動作仍然引起關注。
買地後公司如果出售其他資產，增加資產流轉，有利改善股東回報。
陸羽仁
上一頁 下一頁
金融High Tea 舊文