金融High Tea 2012年12月21日
金融High Tea——聖誕鐘 炒銀行
2012年12月21日
■以前流行「聖誕鐘買滙豐」，不過自從滙控在2007年金融海嘯以後，呢支歌仔無唱好耐。資料圖片
■渣打昨日大升3%，收195.5元。資料圖片
美股近日大上大落，中港兩地股市平平無奇。以前流行「聖誕鐘買匯豐」，不過自從匯控(005)在2007年金融海嘯廢咗以後，呢支歌仔無唱好耐，但係今年得喎，股價昨日破頂，升1.4%，收81.65元，再創52周新高，單係佢已經帶動恒指升62點，一隻股獨撐大市，大笨象終於威番次。
匯控發威同早前宣佈大手減持麻煩資產有關，其後又宣佈賠19.2億美元俾美國和解，負面嘢減少，變成正面嘢主導，破吓位向吓上都唔出奇。我9月時已經話匯控破位開始向上，如今果然。
匯控在收市後公佈，將持有的越南保險公司保越的18%股權，售予住友生命保險相互會社，作價70,980億越南盾(約等於3.4億美元)，該交易將於明年第一季內完成。匯豐亞太區行政總裁王冬勝話，這次交易是推行集團策略的又一進展，使集團能以集中財力與資源，投放於核心業務。匯控續有出售非核心業務消息支持，繼續有得炒。
渣打起步挑戰高位
若單以昨日計，渣打(2888)勁過匯控，佢昨日大升3%，收195.5元，上周二渣打和美國和解，前後賠6.7億美元搞掂美國單洗黑錢官司，當時我已經話「渣打股價落後匯控，但匯控今年中期業績要倒退8.7%，而渣打中期純利還有11.5%增長，加上亞洲市場第四季有復甦趨勢，照計渣打往後有條件追番少少落後。」其後渣打真係發威，由當日的185.5元，升到而家的195.5元，升咗10元，升幅5.3%。
我估渣打下半年業績唔差，但佢全年高位204元，而家仲未創新高，跑輸大市，現價12.5倍市盈率，3.1厘息，唔算貴，而家聖誕鐘炒銀行股，渣打往後有條件挑戰番高位。
內地A股繼續反覆靠穩，港股亦在窄幅牛皮，收市升36點。昨日太陽能股就因為阿爺有政策支持，炒到飛起。其中細股光伏太陽能電池生產商中國源暢(155)勁抽17.9%，陽光能源(757)飆升16.3%。
太陽能股大炒救市
市場見國內太陽能業呢幾年實死得在太醜樣，已預計阿爺會出招打救，相關股份踏入12月份已經起動，龍頭股保利協鑫(3800)踏入12月保利協鑫累積升幅接近三成。
中國光伏行業，可以講水深火熱，歸納出四大宏觀原因：包括歐美市場唔掂、原料難以自給、需求並非剛性、而且沒有核心技術，入場容易。最大鑊嘅係供過於求，十分嚴重。保利協鑫11月時公佈，多晶矽產量今年頭三季累積產量按年升78.4%，達3.29萬公噸，銷售量卻只有9669公噸，平均售價卻較去年同期大跌超過六成。佢係多晶矽同矽片呢兩個生產環節的龍頭企業，都咁唔掂，難怪國內外投行分析師普遍認為，中國光伏企業已瀕臨破產。
中國唔想這個行業死，唯有自己大力投資打補針，但整個行業還要有較長調整淘汰，若有貨在手，見升得太急時，不妨減持少少食吓胡先。
陸羽仁
上一頁 下一頁
金融High Tea 舊文