金融High Tea 2012年12月5日
金融High Tea——大象排毒中
2012年12月5日
■滙控今年表現一洗頹氣，股價由去年底11月的57.45元，一路升至昨日的17個月高位78.7元。資料圖片
昨日港股都只係上落市，內地上證綜指升番0.8％，但港股只係反彈32點升0.2％，弱底未除，倒是重磅股匯控(005)表現較佳，收報78.7元，升0.5%，支撐大市。
本地股民對大笨象匯控可以話又愛又恨，皆因過去佢係股民愛股，逢低必買，逢買必贏，但自從金融海嘯後都無呢枝歌仔唱。不過大象今年表現一洗頹氣，股價由去年底11月的57.45元，一路升至昨日的17個月高位78.7元，一年時間升番45%，認真唔簡單。市場睇番好啲佢，主要原因係有消息指匯豐開始出售共值442億美元的美國次按有毒資產，雖然係蝕住賣，但對股東回報有利。
英國傳媒報道，匯豐擬斬件式出售美國次按債券，明年會先出售4個有關組合，資產值共27億美元，有對沖基金已經表示興趣。這是2008年雷曼兄弟倒閉以來，匯豐首次沽出次按資產，集團為次按組合已作出近30億美元的撇帳，美國樓市又有少少起色，所以匯豐賣次按資產的作價相對於帳上已減低的價值，隨時唔使蝕。匯控在排毒中，逐步解毒，股價壓力都少些。
我在8月時都講過匯控開始走番入一條上升軌中，叫大家留意吓，當時佢股價大若68元，升咗幾個月，上升走勢更明顯，呢兩日略回，昨收78.7元。茶友講起，若有興趣炒吓大笨象，可以咁玩，每次等佢從高位回落5％左右，可以買吓，然後等佢上穿高位，高過上次高位3、4％可以走，等佢回落再買，以最近高位79.55元，比高位低5％，即係回到75.6元時可以開始買吓，即係每一轉目標只係執佢8至9％，亦以相同比例止蝕。
高盛睇A股升26％
內地A股市方面，上證綜指連鐵底2000點都磨穿。高盛亞太區首席策略分析師慕天輝話，內地股市受到三大因素影響：包括中企業盈利能力、阿爺政策方向以及供應過剩問題。他估計情況會改善改善，加上A股估值低至市盈率9倍，比H股9.7倍更低。估計至明年底滬深300指數潛在升幅有26%。明年內地會有結構性改革，故睇好保險及鐵路板塊股。至於國企指數明年底目標為12500點，較現水準有18%潛在升幅。
濠賭股跌鑊金可低吸
講起澳門濠賭股，昨日顯著下跌，澳博(880)、永利(1128)跌6％，金沙(1928)跌4％，愈大隻愈跌得勁，大家初時懷疑因為澳門11月份博彩收入增長8%，升幅收窄，所以市場拋售有關股票，後來才發覺同前政治局委員薄熙來有關。
原來英國《泰晤士報》出咗段嘢，引述澳門警方消息人士話，內地仍在調查薄熙來是否曾經在澳門非法洗黑錢，在11月底內地派出調查人員到澳門突擊調查，檢查了澳門一家大型賭場的貴賓包廂，扣留了6名懷疑中介人士。就係俾呢段新聞嚇一嚇，嚇到濠賭股係咁跌。
我同中環茶友傾起，有少少覺得濠賭股因為呢條消息全線跌，係唔係有少少反應過敏？一則只係話查咗一間賭場，唔係間間中，澳門街咁細，照計查邊間好易通天，跌得最多的嫌疑較大，其實唔關事又使乜跌咁多？其次係澳門唔同美國，美國查銀行洗黑錢，其實係發窮惡搵水，總之間間都查，你頂唔順就賠錢和解，賠親都幾億美金，所以銀行股因而大跌有理由。阿爺查薄熙來洗黑錢，並唔係想逼賭場賠錢，而係真正想追尋黑錢下落，不會胡亂搵賭場開刀，茶友結論係反其道而行，等濠賭股跌深啲，反而可以低撈炒一轉。
陸羽仁
上一頁 下一頁
金融High Tea 舊文