金融High Tea 2013年1月31日
金融High Tea——旺市避衰股
2013年1月31日
■中移動本來已經落後，但近排阿爺嘅消息令佢又插一棍，上升軌穿晒。資料圖片
昨日係期指結算日，港股又抽高，升上21個月高位，是2011年5月以來最高，現貨衝穿23900點，收23822點，升166點，成交升番上761億；下個月期指仲見過高位24000點。
又唔可以話升市無理由，因為外圍全部升，杜指差46點就升到14000點大關，內地上證綜指升1%，日經指數升2%，港股只係跟升，不過成個星期都無乜大力啲嘅破位向上，個樣好似托住匯控(005)來沽貨咁樣，昨日先至叫做有啲力水上市。
大市升到近24000點，要再向上除非有資金流入，或有重大消息利好，若然呢兩種力量都唔夠，外圍又升的話，就好以呢一兩個星期的情況，都跟住外圍升，但只係慢升。
我發覺散戶有時唔理市況好壞，都係有自己的一套炒法，有人興撈底，就無論大市如何都想撈底，我就認為要跟大市玩；市旺，都係跟紅頂白，要跟旺股，避開衰股，好似中移動(941)，有朋友老是問好唔好買佢，見佢跌咗唔少而想撈，我話中移動本來已經落後，近排阿爺仲話研究俾非傳統經營者搞移動電話服務，叫佢哋租三大移動電話商個網絡嚟做就得，消息一出中移動又插一棍，上升軌穿晒。
我同朋友講，若果個市好呆，你買着隻股唔升都無咁㷫，如果個市都OK，人地隻隻升，你買着隻弱股，人升佢唔升，就真係唔係咁好受。
內地券商股試緊頂
計番指數股，匯控(005)呀、中國海外(688)呀，都好過中移動。
至於話大市係唔係會再上，我覺得過年前都可以升吓，但貨多者不妨趁高減少少倉，一來食胡過年，二來大市即使可以升穿24000點，25000點的阻力都極大，短期內向上走的空間有限。
講開強股，昨日非中資證券股莫屬，內地和台灣金融監管機構正考慮進一步取消兩岸股票交易的限制。台灣會放多啲內地基金用作合資格境內機構投資者(QDII)買台灣股，內地話考慮讓台灣居民投資內地A股市場。
我覺得內地呢條水，香港不但不可以獨食，而且分散開來都唔知夠唔夠人爭食，不過呢啲消息對內地券商股十分有利，中信證券(6030)升6%；海通證券(6837)升5%。內地券商股近排升咗唔少，以中信證券為例，兩個月唔夠升咗51%，現價市盈率雖然只有13.9倍，問題係佢去年中期盈利跌咗24%，全年盈利勢將倒退，小心佢試一試高位之後可能見咗頂。
歲寶好樣衰唔好掂
至於本地券商股，昨日跟住升，敦沛(812)升4%、耀才(1428)升2%，去年本地經紀行生意十分難做，若因為台灣內地打通證券生意，關香港券商乜事，都係炒開大陸證券股順手炒吓。
昨日大跌股包括停牌10個月後復牌的歲寶百貨(312)，單日急挫25%。歲寶自去年2011年3月29日下午起停牌，歲寶百貨前日公佈截至去年6月底止，中期虧損1,384萬元人民幣，主要由於新設10間百貨店令成本急升、銷售額減少、專營銷售佣金下降等因素。更大問題是核數師畢馬威就2011年及2012年年初進行之若干交易持保留意見。
佢2010年剛上市嗰年賺過2億，嗰時炒內地百貨零售股，曾經熱炒，但家走晒樣，核數師話有保留意見，即係話有嘢核唔到數，唔知啲數掂唔掂。又係嗰一句，旺市唔好掂衰股，佢反彈都唔到你賺。
陸羽仁
上一頁 下一頁
金融High Tea 舊文