金融High Tea 2013年3月5日
金融High Tea——脆弱
2013年3月5日
一個調控樓市的「國五條」實施細則，打到內地股市人仰馬翻，國內上證綜指插3.7%，深圳指數更大跌5.3％，內地跌到天昏地暗，拖住港股向下，恒指跌342點至22538點，跌幅1.5％，再度失守10天線，但未穿上周三期指結算日造出的22445點低位。大市成交828億元。
內房股板塊係拖累大市向下的主要元兇。恒生地產分類指數勁插3.4%！內房股跌勢慘烈。龍股頭中海外(688)及華潤地產(1109)，分別勁插超過7.1%及8.8%。遠洋地產、保利置業(119)、花樣年(1777)跌超過9%，富力(2777)更大插近11%。
內地49內房跌停
中環茶友話，內地股市反應比想像中大，但港股相對內地股市卻算跌得少。佢話見到「國五條」實施細則無乜勁辣招，最勁只係5年內轉售單位，要按賺價交20%資本增值稅，而不是過去按總樓價交1％。但呢啲措施只打擊到短炒，唔係太打擊到用家，按內地術語對「剛性需求」影響有限，和香港買樓三年內沽要按總價(不是按賺價)俾10至20％額外印花稅無得比。但估不到內地股市跌咁多， 只能夠理解內地股壇人心脆弱，大家本來都不信升市可以持續，一有壞消息就掟貨。
茶友話，美股強，大陸股弱，香港夾在中間，亦比大陸股市強少少。唔好以為在港上市的內房股H股跌得多，在內地上市的A股跌得仲多，內地昨日有近80隻股跌10％跌到停板，其中49隻為內房股，相關行業亦勁插，地產板塊重挫逾7%、水泥板塊重挫逾8%，金融、煤炭板塊跌逾6%。睇住內地跌到咁，港股跌幅都算克己啦。但唔好以為港股唔會大跌，大家求神拜佛要美股生生性性，否則港股要追跌。
港股在美國表現個別發展，匯控跌0.749元，收報83.501元；中國移動升0.670元，收報84.170元；中國石化升0.03元，收報8.93元。
證券商大多預計新措施對內房股影響有限。摩通預期一、二線城市第二季銷售或會按年下跌，因為內地一線城市樓價升幅較大，所以面對進一步緊縮政策的可能性非常高，呼籲投資者選擇和挑選業務集中於非一、二線城市的內房股，如碧桂園(2007)；估計銷售集中在一、二線城市的內房股，2013財年或面臨10至15%的價格修正，包括恆盛(845)、遠洋地產(3377)、龍湖(960)、瑞房(272)、合景泰富(1813)及富力(2777)。
大象遜預期未恐慌
高盛的睇法比較樂觀，建議投資者藉調整買內房股，原因是樓市調控是意料之內，雖然短期內會影響買家入市信心，不過由於內房發展商資本雄厚，相信不會大幅降價售樓，當投資者注意到樓價未有大幅回落，仍然會再度入市。
另外睇睇匯控(005)業績，佢公佈去年全年稅前盈利為207億美元，跌6%，較彭博綜合26個分析員預測的中位數235億美元為低。期內純利為140億美元，跌16.5%，而彭博綜合分析員預測為158億美元。匯控期內賠了19億美元俾美國政府就洗錢案作和解，影響了業績。匯控增加派息取悅股東，去年全年派息0.45美元，升10%。
匯控業績雖然差過預期，但佢公佈業績後在倫敦股價一度上升，其後回落近3%。匯控昨日在港收市則跌1.2%，報84.25元。匯控國際基準稅前利潤升18%，這個數字較反映匯控持續經營業務的基本狀況，和大力削減開支收效有關，但市場仍然覺得數字低過預期。值得注意的是，匯控未能達到部份財務指標，包括平均普通股股東權益回報率由2011年的10.9%，跌至8.4%，遠較目標的12%至15%為低，未來仍要努力增收節支。
陸羽仁
上一頁 下一頁
金融High Tea 舊文