金融High Tea 2013年6月10日
金融High Tea——順勢
2013年6月10日
上周五港股跌263點，跌到21575點，弱勢持續。不過到杜指當日就大反彈，急升207點。中國這3天進入端午節小型長假休市，港股短期受美股左右的力度增大。不過美股仍處回吐狀態，暫時唔好睇得太樂觀。
這一陣子美股輕微回吐，但國際金融市場卻有大波動，美元向上、美債急回、債息向上，搞到投資市場大執位，這一切均源於市場對聯儲局可能閂水喉的疑慮。美國上周五公佈5月非農業就業職位增長17.5萬個，屬於「唔好唔壞」的數字；5月失業率則微升0.1個百分點到7.6%，加埋就令市場感到經濟唔係恢復得咁快，聯儲局唔會咁快收水，所以個市就大幅反彈。
追蹤美國這一浪回吐，源於兩個多星期前聯儲局公佈上次會議紀錄，首次提到會上有委員建議最快在6月決定減低買債數量，證實了「可能收水」的傳言，令美股過去兩周有較像樣的回吐。在聯儲局公佈會議紀錄前，《華爾街日報》記者Jon Hilsenrath早在5月10日已撰文預告這消息，他那篇報道題為《聯儲局制定退出刺激的計劃》，詳細講出上次聯儲局會議開始有明確聲音要求研究退市。由於Jon Hilsenrath出晒名係聯儲局主席伯南克的喉舌，不少聯儲局的消息都通過Jon Hilsenrath的文章透露出街，市場認為上次Jon Hilsenrath撰文話聯儲局制定退市計劃，就係伯南克提早放風，以減低4月會議紀錄公佈時的震盪，結論係唔好睇少此君文章的影響力。
伯南克喉舌又發功
上周五Jon Hilsenrath又發功，佢在《華爾街日報》撰文，題為《聯儲局按計劃在今年稍後減量買債》，聯儲局官員很可能在下周二舉行的6月會議上暗示，只要經濟不令人失望，儲局在今年稍後會縮減每月850億美元的買債計劃。剛公佈「唔太冷又唔太熱」的5月就業數字，正好令聯儲局不用馬上開始收縮買債計劃，他們會在下周二至周三召開的會議中，指出現時看到經濟正在改善，這就是減低量化寬鬆的前提。
文章改述亞特蘭大儲銀行長洛克哈特(Dennis Lockhart)話：「我們正走向一個階段，可以開始考慮調整買債計劃。」Jon Hilsenrath特別指明洛克哈特係儲局內所謂「中間派」，並非支持收水的「鷹派」，或如伯南克那樣支持放水的「鴿派」，中間派會隨多數決策，即係話中間派都開始傾向收水。
Jon Hilsenrath形容聯儲局官員要睇到就業有「重大改善」才會完全結束買債計劃，但如今「好多」儲局官員相信就業市場及經濟已有足夠進展，可考慮部份減少買債，當然他們對完全停止買債仍有疑慮，主要是聯邦政府加稅和削減赤字的影響，在第二季和第三季才會浮現，他們想看到經濟如何抵抗這些衝擊，才改動買債計劃。文章特別引述紐約儲銀行長達德利(William Dudley)上月公開提到：「在未來數個月，經濟如何對抗重大的財政衝擊，將是聯儲局考慮退市的主要因素。」Jon Hilsenrath形容達德利是伯南克的決策「內圈人士」，佢的意見反映咗伯南克的看法。
年內減買債影響大
唔好介意我用咁多篇幅引述《華爾街日報》一篇文章，皆因金股匯所有金融市場，都受聯儲局印錢一大政策左右，若然此政策有變，或稍微露出變化的苗頭，金融市場就會大變，而且大變已在發生。自2008年底聯儲局開始瘋狂印錢以來，美元大跌、美股大升、美債大升、債息大跌，是過去5年主導金融市場最大的潮流，若然美國大印錢的方向開始改變，必將導致上述各市場的方向大逆轉，好運的話，就軟着陸，唔好運的話，就可能大跌，你睇少一眼都會中招。
Jon Hilsenrath的文章若是放風之作，就係放出聯儲局將在下周二舉行的6月會議上暗示，今年稍後會縮減每月850億美元買債計劃，目的是先放氣球，減少政策真正曝光時的震盪。若然聯儲局下周會議真係作出減買債的暗示，小心過去一段見到美元回升、美股回吐、美債急跌、債息向上的逆流，會行得更深。從宏觀角度看，這些資產或已轉勢。
短炒長揸 建議不同
以香港房託股領匯(823)為例，就有轉勢之險。上星期有好日唔搵我的朋友打電話嚟，話領匯今年高位46.4元，依家插到38.7元，跌幅超過16%，佢想入市撈底，問我點睇。佢仲話領匯公佈完業績後回落唔少，依家市盈率4.2倍，息率3.8厘，買佢長揸收息真係幾正咁話。
我有時好怕呢啲朋友電話，因為佢地永遠唔講清楚自己真正想點。好多人個心可能想炒一轉，但把口唔好意思講，就將自己講成長線投資者，但呢啲行為好似睇醫生唔講清楚自己有乜病一樣，會搞到醫生斷錯症、開錯方。以領匯呢個例子講，短炒跌得多跌得急隨時有條件反彈，但想長揸見到佢個圖都唔開胃，恐怕美國收水潮慢慢展開，領匯有轉勢向下的可能。
領匯先跟外圍美債息升、收息股跌的浪潮，先跌一浸；到出完業績後，再跌一浸。睇番佢業績的確無乜驚喜，佢公佈截至3月底止全年業績，全年可分派收入為33.49億元，升14.6%，比市場預期差；每基金單位分派按年增加13.1%至146.46仙，稍勝市場預期的145.9仙。細心比較領匯上半年和下半年度的業績，佢61%收入來自商舖租金，呢部份最重要，在全年出租率達96.3%創新高的情況下，下半年度商舖續租租金調升率僅得24.7%，低於去年上半年的27.9%，顯示領匯加租已經唔係咁得心應手，甚至是租金見頂的先兆。
領匯破位 長線有危
領匯出業績後，證券界多看淡，花旗本來的領匯目標價最高，但睇完業績都將領匯投資評級由「買入」降級至「中性」，目標價由44.36元降至43.56元。花旗話領匯基本因素仍然強勁，但過去兩年收益率收窄，加上預料中長期市場利率將上調，相信股價上升空間有限；但認為其預測股息收益率將達4%，加上經營狀況風險低，即使利率回升，股價仍然有良好支持。
美銀美林預期美國10年長債息率將在明年首季上升至2.5厘，故將領匯目標價由45元降至39元，維持評級「中性」。高盛反而調高領匯目標價，話領匯去年業績符預期，但預料佢未來12個月每股資產淨值的快速升勢將放緩，該行輕微上調領匯12個月目標價，由37元升至37.6元，評級「中性」。
我話股份愈大隻，投資期愈長，股份的走勢愈易睇，中長線買股要順勢，逆勢買股除非出入時間把握得好好，否則好難成功。你打開領匯幅三年圖(見圖)，基本上以一個完美形態向上，自去年5月打後，升幅更轉急，直至今年5月為止，呢一浪由28.4元升到46.4元，中間無大回吐，你用把間尺去劃，都好易劃出一條45度角向上不曾跌穿的上升軌，這種超常升勢，和領匯去年6月公佈業績，以及聯儲局9月推出第三波量化寬鬆有極大關係。
領匯升勢直到近期為止，一跌穿上升軌後便急促向下，亦和聯儲局可能收水，以及佢業績有少少見頂跡象有關。我怕這真是聯儲局一個緩慢收水期開始，咁收息股仲有排回吐，佢好多盈利都係資產升值所致，若利息升樓市跌租金回，市場資金又從收息股流走，佢就受幾重打擊。領匯短期來說極度超賣，隨時反彈，但若長揸，好多人仲當呢啲房產基金係低風險投資，成副身家買入去，或者賣咗層樓全部錢走去買佢，萬一佢3年內回番落30元以下的水平，你揸重貨又頂唔頂得順呢？或許聯儲局唔係真正收水，領匯下跌只是虛驚，但市場上股票多的是，何必去博一隻可能轉勢的股票？
陸羽仁
上一頁 下一頁
金融High Tea 舊文