金融High Tea 2013年7月18日
金融High Tea——反腐黑天鵝
2013年7月18日
港股唔上唔落，事關聯儲局主席伯南克在周三、周四連續兩天出席國會聽證會，唔知佢點講聯儲局減少買債問題，佢先車前三步，再退後兩步，依家唔知佢想點，投資者都係忍吓手，結果恒指昨日微升59點收場，收報21371，成交連續3天不逾500億元，只有485億元。
雖然內地傳將研究擴大房產稅改革試點範圍，並集中以二線城市為主，但內房股股價依然硬淨。
龍頭股中國海外(688)升0.15元。上日大跌的網龍(777)，略為反彈收報19.66元，升0.62元，估計在出售名下移動入門網業務完成前，股價都係浮浮沉沉。騰訊同網龍近月炒風甚烈，現在少了一個摩打，究竟資金會轉去炒其他科網股抑或暫時沉寂下來，未來兩日應該見到端倪。
內地反貪情勢陸續有來，昨日早上一見手機新聞話新華社記者實名舉報華潤集團董事長宋林貪污，心諗華潤系有排煩，特別係事件主角華潤電力(836)。
今次係新華社《經濟參考報》首席記者的王文志在微博上爆料，實名舉報副部級官員、華潤集團董事長宋林等高級管理層，指華潤電力在收購山西金業資產的逾百億元併購案中故意放水，涉嫌未有充份披露，並違規提前支付收購款項，造成數十億元國有資產流失。宋林等人被指在事件中涉嫌巨額貪腐，構成瀆職罪。
華電醜聞早已流傳
華潤電力呢單嘢在內地已炒了一段時間，我睇睇嚇吓都覺得有啲燶味，但本地媒體沒有太多跟進，爆料記者王文志對新京報話，佢在今年年初「發現有媒體在關注這個事兒，也有人給我郵寄了一些舉報資料。
我看了資料發現，這是一個事兒，我就着手開始調查。
我用了近半年的時間，前後去山西實地調查三四次，取得了不少證據。」如今爆料係希望政府嚴肅調查。
我一見係實名舉報就知大鑊，因為這是一個「唔係你死就係我死」的遊戲，內地管理部門過去話好多網上匿名舉報官員是惡意中傷，叫人舉報就要具名。
但過去呢一年發生過多宗具名舉報，一講就中，至少有兩個副部長下了馬，包括被情婦舉報的中央編譯局主要負責人衣俊卿，以及被記者舉報的國家能源局局長劉鐵男，全部中箭下台，事關舉報人開得自己名，無料唔敢亂舉報。
要時時留意反貪新聞
呢啲反貪腐事件成為股市黑天鵝，華潤電力大插10%，收報17.98元，連累同系的華潤創業(291)都跌2.4%。
由於煤價下跌，內地電力股上半年表現唔差，例如中國電力(2380)就發盈喜料中期盈利按年大增，主因煤炭價格下跌，令火電燃料成本下降，以及水電售電量大增。
但電力行業的好嘢，華潤電力都無福消受，佢近排都受呢單傳聞影響，股價弱過人，如今爆出來更傷。
依家咁指控，華潤電力已因此唔見幾十億，佢去年純利39.5億，萬一要撇帳好大打擊。當然佢勁插時可以吼吓，博阿媽幫佢頂數，但買呢啲股記住定止蝕。
過往買國企，好處係有阿爺照唔驚執笠，就算高管出事，都未必會長期影響公司股價，但呢一次事件仍然好驚嚇，中環茶友講起，阿爺反貪，打擊三公消費也好，叫人實名舉報也好，本來係好事，客觀上就變成買中資股的風險，自己買中隻股一中招，真係唔見一大截，只能喊住咁話國家進步緊啦，同時多啲睇內地新聞。
陸羽仁
上一頁 下一頁
金融High Tea 舊文