金融High Tea 2013年12月24日
徐步高賭波
2013年12月24日
美國啟動收水，外圍股市相當靚仔，美股升完歐股升，歐股升完美股又升，喺咁嘅環境下，港股叫做反彈吓，不過，基金經理買貨意欲唔算太強，放假之前，大有慳水慳力之感。
港視爆升賠率急跌
市場昨日焦點，係幾隻本地電訊股，包括香港電視(1137) 買流動電視頻譜，仲有重新成為本地網絡市場一哥的香港電訊(6823) 。若講公眾興趣，大家當然係留意魔童王維基上周五宣佈獲中移動(941) 出讓旗下香港流動電視業務，而且仲揀明年「七一」開台，有中環茶友笑語，唔通佢係想提醒市民，一路上街遊行，可以一路睇電視啩。
唔講政治講經濟，今次魔童兜個彎去搞電視，市場反應就好正面，佢名下的香港電視受刺激股價狂升，全日收報3.85元，大升66%；早已獲得免費電視牌照的有線寬頻(1097) ，股價亦飆5%，報0.82元；電盈(008) 漲1.2%，報3.4元；電視廣播(511) 逆市跌0.15元，報49.95元。
魔童爭免費電視牌贏到唔少人支持，陸羽仁睇過佢啲劇集製作，都覺得有板有眼。不過，炒股唔同睇電視，睇感覺之外仲要睇數字，從呢個角度去睇，有茶友形容香港電視急升係「徐步高賭波」的現象。
「警魔」徐步高曾自爆賭波威水史，佢話睇世界盃賭波，有場係中日大戰，當時好多中國人受情感驅使，紛紛落注買中國贏，結果搞到世界排名高幾班的日本，賠率同中國差唔多，結果就用七萬五千元，重注買日本贏，結果如何唔使再講啦。
買股同賭波一樣，除咗講公司質素，仲要講賠率。香港電視攞到流動電視經營權，有人形容係鹹魚翻生，有機會進軍電視市場，從員工及觀眾角度，呢個睇法一啲都無錯，好多人都希望魔童生生性性，威畀大家睇。不過，如果從數字睇，香港電視乜都無搞，市值已經去到31億元，就算魔童搞電視搞得唔錯，但係可見將來股價仲有幾多上升空間呢？
記得搞咗幾十年電視的蔡和平話，無綫而家一年賺緊十幾億元，但如果多幾間電視台爭食，可能就個個都無錢賺。假設無咁悲觀，未來四間免費電視台同香港電視一齊分10億元盈利，港視現價市盈率都去到15倍。相比下，今年據講會轉虧為盈，已經有牌的有線寬頻，市值只係港視一半左右。
上車短炒要識落車
茶友話，好多人支持魔童搞電視，正如好多中國人想中國贏波，個個追捧搞到個賠率低晒，相反睇落高班啲的日本，賠率反而高一倍。如果係用數字去計邊隻抵啲，答案好清楚，所以你去炒港視，係希望賺快錢博一轉無所謂，最緊要係識上車落車囉。
港視呢單嘢鬼咁熱鬧，搞到中移動個朵都響埋，昨日竟有師奶朋友甚至問我係唔係中移動要賣盤。事實上，中移動近期動作又真係幾多。蘋果公司宣佈與中移動簽訂了銷售iPhone 5s及5c的協議，由明年1月17日起開始銷售。除咗電訊股多消息，港股假日氣氛已經好濃，由於內地懶理上海同業拆息再飆，上證指數連跌9個交易日終於止血，令港股收報22921，升109點；國企指數收報10647，升番18點嚟等過聖誕。
陸羽仁
金融High Tea 舊文