陸羽仁 BLOG 2014年1月2日
好難大爆發
2014/1/2 上午 09:45:22
網誌分類: 經濟
杜指2013年最後一個交易日高收72點，臨尾都要再創一次歷史新高，好頭好尾也。杜指由2009年3月2日的6627點開始反彈，一路係咁升，升足5年，中間停都唔停一下，至2013年的16577點收爐，升幅超過250%，完全係放水所致。港股由2009年3月低位11344點，升到2010年11月24988點，就此行人止步，之後3年都係上落市，而家都未到高位。
美股升得咁勁，主要拜聯儲局連續三次量寬(QE)所賜。市場本來以為聯儲局去年底決定收水，美股預計會有番一定的振盪、一定的回調，結果又係跌到一地眼鏡，連股神巴菲特都無法倖免。佢對於美股後市睇得好樂觀，話條命夠長的話，杜指萬六點其實好濕碎，不過於9月時亦提過聯儲局一旦收水將如「一鎗天下響」，美股以至全球股市都會震一震。但結果剛剛相反，聯儲局宣布今年開始收水，美股以至全球股市不跌反升，美股不斷刷新歷史新高。
有分析解釋，一來係聯儲局的收水預期管理做得好成功，之前不斷咁講，債息升定先，投資者早已做好收水的心理準備，接受了聯儲局「收水不等於加息」的政策，預期美國利息會維持在現時的超低水平一段長時間。
另外，隨住美國經濟去年下半年有明顯改善，非農業就業職位增長連續三個月超過20萬人，失業率降至7%；美國第三季GDP增長更由2.8%上調至3.6%。分析指出，市場已經將聯儲局削減刺激經濟規模視為當局對未來經濟增長態度樂觀的明證。
展望美股今年走勢，市場普遍認為美股雖然已經升得好高，但升勢仍將延續。美國經濟近期增長唔錯，但美企盈利增長就跟唔上。由於增長緩慢，投資者開始擔心美股價格已經過高。事實上，據FactSet統計資料，標普500指數過去10年平均P/E為14.1倍，現在已經去到15.4倍。財務諮詢公司Edward Jones的投資分析師Kate Warne昨日提醒投資者，大部股票已經唔平，現時最重要的投資策略係尋找估價比較吸引的股票。另外，美國10年期國債息上周五升上3厘，係兩年多以來首次。債息向上，已預示未來趨勢，公用股及房地產信託這類高息股亦唔再有吸引力。
有淡友亦有好友，沃頓商學院教授、《投資王道》作者西格爾(Jeremy Siegel)睇好美股，佢話在牛市時，股票通常不會在升至市場合理價位就停，會升到突。杜指今年的合理水平是18000點，但牛市下指數通常可超升10%至20%，故杜指今年高位可超越21000點，即可再升27%。
西格爾指市場普遍認為股市的合理市盈率約15倍，但該看法主要應用在利息較高高的環境，以如今的利息，他認為股票市盈率應約在18至19倍；佢又預期指數成份股今年盈利保守估計可增長5%，加上未出現全民皆股的現象，大市應該仲有得升。
西格爾過去幾年做友都中，他在2012年杜指只是12000點時已經預期，杜指在2013年將升至15000點，甚至17000點的水平；近期他預估杜指將會在2013年底達至16000至17000點水平，結果杜指在年結日以16576點收市。又睇吓佢今次中唔中。
不過美國企業盈利的確有點支持，隨住美國經濟改善，歐元區經濟亦企番穩，大型藍籌股，例如 GE、 Honeywell、Caterpillar 及United Technologies，將會跑贏細規模企業股票。2013年的大企業資本支出(capital spending)只有2.5%，高盛指出去年11月時，耐用品訂單增長3.5%，差唔多係全年最高，而預計去年第四季GDP增長亦會超過3%，所以估計大企業資本支出會大幅增加至6.8%，2016年亦會有5.5%。企業增加資本開支，利好經濟和股市。
我今年都睇好美股一點，但港股只是溫和看，即使升穿25000點，都好難有大突破，主要因為大陸經濟未具大爆發的條件，所以股市升得多時要小心。
陸羽仁
回應(3) 我想回應
陸羽仁 BLOG 舊文