中環在線：出席TCL活動忽然技癢陸東手機騷講股樓 - 李華華
陸東CHOK住SELL手機港樓唔OK
星級分析員陸東於2010年開始做TCL通訊(2618)獨董，冇耐就幫TCL出品嘅智能手機拍硬照賣廣告，最近有新一輯廣告出街。
公司噚日搞咗個活動做推介，不過陸東就唔係sell新手機，而係講番佢最在行嘅股樓前瞻喎。
■陸東講股樓唔係臨時拉夫，有曬數據支持仲做埋powerpoint。李潤芳攝
TCL噚日搞呢個活動都幾有新意，首先由高層介紹新手機，中途加插一個環節畀陸東。
原先以為佢會用獨董或代言人身份做介紹，點知佢一走上到台就大講經濟同埋樓巿，一講就講足10分鐘。估唔到手機推介會可以聯乘財經talk show！
可能陸東周不時都會接受雜誌訪問，佢今次講嘅內容都冇乜特別，佢估計，樓價會由高峯時期跌一半，預計今年跌10%至15%。𠵱家潮流興網購，佢又估計，今年網上零售銷售額可以再升四成。
■宣傳電子產品呢家嘢，點少得一班妙齡model。
chok樣做model對辦
講番陸東呢款新廣告，又係擺出一副唔望鏡頭嘅chok樣，一手㩒個電話落袋，做model都做得似模似樣。佢分享拍攝心得，話原先公司叫佢預留一日拍攝，佢講價還價之後，最終用咗一個下晝就完成。拍攝前，佢冇專登走去做facial，照咁講，佢對自己嘅膚質或者執相師傅都幾有信心。
陸東入TCL當然唔止賣樣，𠵱家巿場監管越來越嚴，佢話間唔中都要提醒公司，唔好漏報。
講開申報，按聯交所資料，陸東本月初行使認股權，沽咗一批TCL套現57萬元，連同舊年底另一批，合共套現400萬元。陸東話因為認股權就快到期先至沽。
李華華
mailto:LiWaWa@AppleDaily.com
上一則: 樂香園：銀河味的旺旺酸奶 - 海迪
下一則: 中環在線：書癡郭炳聯最愛問人睇緊乜 - 李華華
中環在線 - 李華華 舊文