青心直說：戰場在互聯網 - 胡孟青
■筆者認為，互聯網新經濟崛起，客戶就是最大資產，得戶口得天下，互聯網是主戰場。路透社
噚日之前，相信王維基不會料到形勢急轉直下。最神奇的是，股價連番破底、跌勢未止的中移動(941)，其董事長奚國華，未待下周四公佈業績，早唔講、遲唔講，出咗事就出嚟話早知，連國家隊都疑似跣你，真係唔知魔童仲可以點拆，「走投無路」四字何其合時。話說祖國移動當年旗下香江移動無端端爭住去投得流動電視服務牌照，卻原來是大玩生人霸死地，既然政府早已表明機頂盒入屋用戶上限係攞你命五千，斷估冇理由淨係冇畀魔童知，就算堂堂國家隊買個牌，就是為咗等下一個儍仔，好想知究竟魔童的律師團隊渣或係唔小心，鬼掩眼睇唔到，令魔童落得如斯田地。假如真係有人睇漏眼，恕小妹睇得太多《無間道》，魔童是否太儍、太天真，信錯人？
飢餓營銷搶奪用戶
適逢互聯網新經濟崛起，客戶就是最大資產，得戶口得天下，話知你開咗戶唔睇唔用，正如小米的雷軍不斷強調，「我們不是手機公司，亦非移動互聯網公司，我們是一家品牌、文化公司。」在小米商城上，一部47吋小米電視，竟3,000蚊人仔有找，還內置小米盒子，支持3D、全高清、杜比立體聲、雙頻Wi-Fi等等，足夠打殘電視生產商。還要想買都買唔到，要上網bid，簡直把飢餓營銷的精神推向最高峯。說穿了，其實他要搶奪的，是互聯網人口。
這亦正好解釋了為甚麼在兩會提案中，會發出加快實施大數據國家戰略建議。Client base就係一切，懶理它是重複同一人登記，數字就是關鍵，因分析員先看大數。由此亦可理解，分析員對騰訊(700)旗下微信所作出的估值，何解可以在短短一年內，自300億美元翻一番。
事到如今，如魔童心中的團火仍未被淋熄，索性以退為進齋搞互聯網電視，一旦俾你click中一齣叫好叫座的，單是收贊助都夠封蝕本門，反正沒有駁上網的電視機，對年輕人來說，已淪為家中裝飾擺設。
胡孟青
獨立股評人
上一則: 財智語陸：沽壓驟增宜先減磅 - 陳永陸
下一則: 新隆中對：世紀金融騙局 - 楊衛隆
~TITLE_S~青心直說 - 胡孟青 2014年3月13日 舊文