金融High Tea 2014年3月13日
大股謝晒 細股癲晒
2014年03月13日
話口未完，港股昨日再出現大跌，傳統3月炒兩會同業績的旺季，出現反常天氣，今個星期港股累跌成700點，好多大股跌到慘不忍睹。有中環茶友講笑，陸Sir你呢排好似做咗淡友喎！
陸羽仁做淡友？
對於「做淡友」之說，陸羽仁笑言，自己只係仰觀天象，見到有特殊狀況，所以出嚟講兩句啫。今年股市搞出厄爾尼諾天文異象，我覺得根源之一，正係大家炒得起勁的科網熱。大家如果有留意，呢排跌得好勁的股份，不少都係傳統產業的龍頭大股，好似內銀、電訊，昨日中移動(941) 就跌到70元邊，同一年內高位89.2元，足足跌咗22%，遠遠超過大市，跌到家中移動市盈率只有8.74厘，股息率去到4.87厘，數字相當吸引，咁「靚」的數字唔係因為佢業績靚仔增長勁，而係股價跌得快過業績好多啫。
中移動點解跌得咁勁，主要係網絡媒體興起，好似騰訊(700) 的WeChat侵蝕咗中移動好多傳統利錢深的生意，好似跨省短訊等，以前中移動單單靠呢幾樣業務，已經賺緊數以十億元計的利潤，家呢啲利錢部份轉移咗去俾騰訊，部份就蒸發咗，佢正正變成「終日被人移動」。
同樣情況都發生係內銀股身上，家好似阿里巴巴搞緊的餘額寶，被人話會挑戰傳統銀行的理財生意，呢樣嘢係唔係最後會發生唔知，但就已令到基金大戶唔敢再買重內銀股，喺買貨人少，沽貨人多下，搞到內銀股都急急跌。
網絡公司未建設、先破壞，摧毀市場領導者收入的搶生意模式，自然會遇到抵抗，好似家內銀股都想聯手封殺網企資金流入銀行體系。過去，騰訊推出即時資訊軟件，中移動都曾經想過封殺，但係社會輿論壓力下終於無功而退，家網企挑戰銀行未知能否成功，但已經先搞亂晒內銀股價。
股市發揮催情作用
網企挑戰傳統龍頭巨企，令市場產生搶食對手大餅的憧憬，令佢哋股價升完又升，喺股市的「催情」作用下，網企自己都興奮莫明，有啲殺得性起，好似內地網企「雙馬」馬化騰同馬雲，由鬥做的士服務到鬥收購上市公司，掟錢掟到通街係。股仔文化中國傳播(1060) 成為最新的「雙馬」概念股，繼早前有騰訊入股後，再獲得阿里巴巴相中，斥資62億元掃入60%股權，昨日復牌後股價應聲發癲狂飆，最多曾抽升4.3倍見3.39元。隨後升幅雖然愈縮愈小，全日收報1.83元，仍升1.19元，升幅1.86倍，成交金額更達55億元，成交僅次於騰訊(700) 的56億元，交投極為驚人。文化中國癲晒，帶挈相關股仔炒上，橙天嘉禾(1132) 升6%造0.73元；美亞娛樂(391) 升5%。
遭阿里橫刀奪愛的騰訊，股價借消息調整曾失守600元關，收報602元，挫2.5%，一股拉低恒指54點。早前獲騰訊入股的華南城(1668) 插低7.5%。阿里有新歡，「舊愛」中信21世紀(241) 重創1.35元，跌18.32%報6.02元。另外，中信銀行(998) 與騰訊合作推出網絡信用卡，信行A股升停板，H股借勢走高3%。
大股謝晒，加上內地上證指數再度跌穿兩千關，港股再度大插，恒生指數一度瀉近400點，收報21901，瀉367點；國企指數收報9364，跌155點。全日共有逾千隻股份下跌，成交同時大增40%至790億元。
陸羽仁
金融High Tea 舊文