鬥顛
2014/3/13 上午 09:56:00
網誌分類: 經濟
日韓香港昨日股市大跌近2%，歐洲股市亦腳軟，市場氣氛低落。美股亦腳軟軟，標普500指數第三日向下，跌3點至1864點，杜指逆市靠穩，收市微漲8點，收16360點。
外圍靜少少再講兩句香港網股的顛市，網企熱炒，我在專欄都講到「雙馬」馬化騰同馬雲亦鬥顛，掟錢掟到通街收購。馬雲第二隻入股的文化中國傳播(1060)
斥資62億元掃入60%股權，昨日復牌後發癲，開市5分鐘最多曾抽升4.3倍見3.39元。隨後升幅雖然愈縮愈小，全日收報1.83元，仍升1.19元，升幅1.86倍，成交金額更達55億元。 但文化中國由3.39元回番落1.83元，從高位已回落46%，即係昨日上半場追入的散戶大部份蟹曬。
呢啲亂棍炒股，真係唔可睇基本因素，以文化中國昨日最高位計，加埋發新股的效應，市值等如705億，唔理馬雲將來利用呢隻殼什麼，若回到正常時，真係唔賺60、70億一年唔值700億市值，機會真係細得好緊要，其顛可見。若說唔睇基本因素，咁真係要好似打機咁，一跌就閃，你昨日在高位買咗文化中國，若唔夠手快不能在5分鐘內一插就沽，起碼唔見20%。見到啲雙馬概念股炒到咁，我都有少少驚啦。大家記住，炒呢啲股，只能以一個「鬥顛」的心態去炒，唔好信馬雲最後能把公司做到幾大，只要想自己幾時把火捧交給一個傻仔。呢個係接力遊戲，直到枝火棒跌落地為止。
睇番外圍，中國經濟疲弱及銅價大跌，開始有人憂慮會唔會係牛仔玩完，熊仔瞓醒的先兆。
繼專欄作家辛西爾(Michael Sincere) 前幾日在MarketWatch撰文指出大市唔係好似大家預期的咁樂觀。牛市已經在3月4日到頂、5歲牛市已經玩完後，另一位MarketWatch的專欄作家Irwin Kellner昨日亦撰文提醒投資者應該做好離場的準備。Kellner所持的理由同辛西爾差唔多，杜指這5年已經升咗2.2倍，但投資者，尤其係散戶，仍然對後市非常樂觀。佢認為呢個係交易員主宰的市場，散戶根本沒什麼贏錢機會。佢話交易員獲利沽貨會掀起恐慌，令大市跌得很快。投資者應該沽貨的原因係地緣政治風險，因為俄烏危機，將再次引發美俄冷戰，許多歐洲的經濟體，與美國及俄國的貿易連結都相當緊密，一旦冷戰開打，將扼殺這樣的連結。
不過有紐約著名分析師則認為依家市場的確陰雲密布，例如美股創新高的次數愈來會少，但又未至於馬上出現風暴，有大跌的訊號。例如通常於風暴來臨前先跌的金融股，近排仍然表現神勇，主要的金融指數基金(Financial ETF)周一仍處於高位。
雖然熊市未似即到，但此前升得好勁，已經開始起泡的板塊，例如醫藥及生物化學股已經聞到過熱味。其中的Illumina今年已經累升了50%，Alexion也有21%。不過，這些公司的財政狀況仍然良好，起碼遠比較2000年至2002科技股泡沫爆破時良好。另一個同屬危險板塊的是「雲端」電腦股，其中包括F5 Networks、Workday、Vmware及Cvent，今年都大升了15%至23%。不過，這些股份到目前為止仍未有馬上大冧市跡象。
陸羽仁
回應(3) 我想回應
陸羽仁 BLOG 舊文