金融High Tea 2014年10月9日
超級富豪搞媒體
2014年10月09日
佔中事態發展等緊班學生同政府開會，警方同示威人士乘機唞唞氣，有人索性喺旺角街頭開張床休息。市場焦點由街頭抗爭轉返去經濟層面，可惜焦點轉移唔等於情況有所改善。美國息口向上，大家有啲驚全球火車頭會受利率向上影響而開慢咗，國基會仲調低全球經濟增長預測。
外圍前景麻麻，本地情況仲「弱雞」，今年黃金周假期，零售業注定開倒車。有行內人講，在十．一金周期間，銅鑼灣、旺角旅遊區被人佔領，部份商戶做唔到生意，有蟹店少東激動到衝入人群，搞到被一名女示威者話佢非禮，雖然係咁，但人流唔去佔領區，唔代表無買嘢，佢哋只係去咗尖東、沙田購物，所以佔中的直接影響無想像中咁大。
真正令人擔心嘅係，佔中發生後，多個國家先後對香港發出咗旅遊警告，加上從外國電視所看到放催激煙同堵塞馬路的鏡頭，唔知會唔會影響旅客外遊香港的意欲，加上有消息話國家旅遊局開始停批香港團簽注，未來本港旅遊零售業所受的影響，先會慢慢浮現。
A股托住 港股跌得少
零售業人士唉聲歎氣，其實本地生意難做，唔係10月先開始，唔可以賴晒佔中，家只不過多番個理由解釋啫。
佔中影響力視乎會否爆大鑊，若然有暴亂同鎮壓，又或者出現持續性野貓式抗爭就好麻煩，呢類影響對香港係比較深遠，短期反而係內地經濟同政策，加上美元美息走勢，更加直接左右港股去向。
撇除本地政治因素，你睇美股近日都一樣有好消息見盡，升勢無以為繼的現象，杜指喺一萬七千點穿梭上落多次，始終無法擺脫阻力，反映資金喺呢個水平十分觀望，單講全球因素，都睇唔到港股可以大升。
不過，如果10月份滬港通真係落實得到，對內地A股帶動會較為有力，之後先輪到港股，因此個市跌到家，有條件進入反彈運行，喺呢個水平反覆上落，等大家炒吓股仔同冷門股過日辰。昨日就有堆彩票股發威，華彩(1371) 收報0.8元，升咗12.7%；御泰中彩(555) 報0.81元，揚3.85%。
國際貨幣基金組織(IMF)第三次下調全球經濟增長預測，杜指上日急瀉272點。好彩內地股市於國慶長假後紅盤高收，恒生指數急跌逾兩百點後跌勢放緩，最終仍守在250天線(23176點)之上，收報23263點，跌159點；國企指數收報10395點，跌73點，成交金額跌至651億元。
多間大行仍睇淡澳門博彩收入前景，濠賭股彈完再散，金沙(1928) 收報42.15元，挫1.1元或2.54%；銀河娛樂(027) 降1.3元或2.68%，報47.15元。市場傳聞銀河兼嘉華國際(173) 大股東呂志和係洽購亞視股東之一。就算傳言係真，亞視呢壇係蝕大本生意，相信新賭王都唔會用上市公司去收購，咁即係用自己錢嚟捱義氣啦，不過最後成唔成事，仲要睇價錢，因為王征要賣盤傳到開巷，咁耐唔成事都係因為叫價太高啫。
傳新賭王斟亞視
有人話，亞視家俾王征搞到咁殘，醫番都嘥藥費，新賭王去接火棒，等如係報效國家。澳門的博彩事業等如係印銀紙，呢啲生意去邊度搵，阿爺畀得個牌你，你唔可以當奉旨，有事時自然要出錢出力；再者，亞視如果搞得似樣啲，就算蝕小小，老闆都係電視大亨喎，呢啲界外利益，上市公司唔值得做，但大富豪就無所謂，所以銀河、嘉華甚至香港電視(1137) 走去投資電視業，都係壞消息，但富豪搞電視，就係另一個算盤，你睇新賭王早排上去見習近平坐喺前面，同一排者有李超人、郭糖王到吳老闆，個個超級富豪都揸住傳媒，就已經係明證啦！
陸羽仁
金融High Tea 舊文