魚樂無窮：樂觀心態炒股最重要
■思想改變行為，行為改變命運，贏輸錢都從好嗰方面諗。 資料圖片
今個星期只係過咗三日，包括唐牛在內嘅戰友卻覺得度日如年。
周初A股已經俾半打壞消息推冧，噚日竟然又俾半打好消息推番上去，左一巴右巴，摑到塊面都冇曬知覺。就算睇到董伯伯問記者「陳生你貴姓」，都真係未必笑得出。
唐牛今日化身心靈導師，唔講追揸沽（事實真係估唔到），講下EQ。「唔通連個天都唔鍾意我？」「希望在明天吖嘛！」呢兩句對白，相信大家都耳熟能詳，印證同一個場景，用不同態度面對，心情都可以南轅北轍。
例子一︰Day low沽貨，然後報復性反彈，做咗支破腳穿頭大陽燭。
悲觀派︰頂！擺明個莊玩嘢啦，使唔使數飛數得咁盡呀，而家好等錢使呀？
樂觀派︰如果day low冇沽貨，可能會跌得深啲，到時輸得更加甘囉。
例子二︰升一成獲利，點知埋單升咗五成，打入十大升幅榜首。
悲觀派︰唉，如果唔係一早沽咗，可以賺多幾皮嘢呀，買少好多玩具呀。
樂觀派︰賺咗一成都ok啦，個市咁難玩，總好過輸囉。
思想改變行為，行為改變命運，贏輸錢都從好嗰方面諗，操盤肯定事半功倍。與其怨天尤人，不如檢討過失，各位戰友共勉之。
唐牛
https://www.facebook.com/tongcow88
唐牛
魚樂無窮 - 唐牛 舊文