金融High Tea 2015年1月5日
芬佬開工 紅色衰股當旺
2015年01月05日
本港股市在過年後首日開紅盤，港股紅盤高收252點，中資股雄霸天下，恒指上周五收報23857點，升252點，升幅1.1%；國指升勢凌厲好多，全日收報12245點，勁升260點，升幅達2.2%，係恒指一倍。
最大路係炒A股指數基金，南方A50(2822) 全日彈4.8%，收報14.52元，成交21.06億元；安碩A50(2823) 漲4.2%，報13.52元，成交34.49億元。
個股升得最多是內險股、內地證券股和內房股。人保(1339) 報3.87元，大升6.6%；平保(2318) 報83.1元，大升5.1%。證券股在上周五午後突然受追捧，銀河證券(6881) 飆6.9%，報10.4元。內銀股升得少啲，如建行(939) 只係升2%，收報6.5元，成交28.9億。
A股指數基金和金融證券股過去一直有升，再升唔奇，但上周五升得最勁的紅色股反而係內房，就有少少奇。中國最大內房商萬科(2202) ，咁大隻股竟然可以一日升10.6%，收報19.14元，創上市新高；其餘一年售樓過千億的所謂「千億俱樂部」成員如恒大(3333) 升6.4%﹔碧桂園(2007) 亦升5.8%。另外講升幅勁就要數保利置業(119) ，午後愈升愈有，全日急漲18.8%，報3.79元。
內房價低 續追落後
萬科咁大隻股咁升法，而且一過年就升，當然唔係散戶買到佢升，而係基金買到升，我話基金新年開局，揸基金盤的芬佬開始追番啲弱少少的內房股，都有少少啟示。你要代入佢哋的思維，佢哋去年11、12月見到紅色股係咁升，若然手上貨唔多，都只會酌情買少少，唔敢買多，怕紅色股狂升後馬上急回，就影響自己投資組合全年業績。所以芬佬在過年前唯有忍手，但新年一過，又開新局，可以進取少少，才有萬科升10%的境況。自去年11月紅色股大升開始，散戶一直都在沽貨，芬佬係買家，但係唔敢大力買，所以內地的A股拋離香港H股愈來愈遠，隻建行H股就比A股落後兩成幾，預料新年過後，芬佬敢買吓貨，未來H股可以追吓落後。
講番內房，我一直話佢哋落後，內地樓市的確有好多庫存賣唔晒，樓價有下跌壓力。但房地產係中國最大的內需，家內地經濟唔得，阿爺更唔可以讓樓市冧，只能放水頂住樓市，所以內房經已脫險。你睇綠城(3900) 老闆宋衛平去年頂唔順，60億賣咗24.3%綠城股份畀同行融創中國(1918) ，後來見個市好番啲，就同融創分手，將批股份再賣畀中交集團，宋衛平咁做的好處係自己可以話番事，由呢個行動可見，綠城脫險，內地房市最壞的情況也過去。我估未來內房股仍有反覆炒上的空間，有貨唔使太急沽。過完年後芬佬開工紅色衰股如內房股當旺，從內房股成交量睇，仲未係好大，顯示芬佬應該未買夠貨，佢哋等回吐會密密吸。
唔識揀股 買指數股
講起沽貨唔好急，令我記起早兩日和中學老師食咗一餐飯，自從畀人知道我係陸羽仁之後，食飯時少不免畀人問吓股。我的老師是退休人士，雖然生活富泰，但錢都係幾十年辛辛苦苦賺番來，所以真係唔夠膽胡亂建議佢哋買股。去年3、4月同老師食咗一次飯，見到老師的投資血跡斑斑，有一個買啲中小型股，大半個倉係蟹貨，另一個其實只係想收息，買啲股票掛鈎證券收息，高位接咗唔少國壽(2628) ，當然亦唔太靚仔。我首先叫揸咗國壽的老師唔好沽住，坐吓等佢見家鄉啦。又叫另一個老師唔好買中小型股票啦，退休人士適宜保守少少，個股唔好買太多啦，買指數基金啦，就叫佢哋等安碩A50基金(2823) 回到8個幾時、或者恒生H股指數基金(2828) 回到9個幾時買吓。(我記得去年年頭年中我在本欄、在頭條網和巴士的報的網誌，都有叫大家買吓呢啲A、H股基金㗎)
結果大半年後，再同老師食飯，佢哋真係買咗2823，我都抹一把汗，隻基金大半年升咗幾成，我叫做有交代啦。我當日叫佢哋有20%好分段走啦，結果老師走咗大部份，只留番四分一左右，食咗20幾個巴仙，有少少覺得沽早咗，因為2823大半年升咗50%以上，若然全部未走就更和味。
經濟好差 唔放唔得
我就同老師講，食得少唔緊要，最緊要有得食，唔輸錢，有錢賺，咁啲錢長線就可以愈滾愈大。我話去年初叫佢哋買2823和2828時，並無估計會升咁多，只係計一年上落波幅大約20幾巴仙，佢哋低位買咗，高位沽吓，好彩食到20%，咁都好好啦。結果升到50幾%，就是意料之外，可以話係意外驚喜，這是例外，並不是正常，主要因為內地經濟比預期放慢得更快，有通縮的危險，阿爺不能不放水救市，所以個市先至係咁升，呢件事唔係必然會發生。
老師問我今年個市點睇？我話一般而言，去年升得多的，今年未必會升，好似前年的明星股係科技股同賭業股，到去年就唔掂。賭業股因為收入下跌而插到七個一皮，科技股只係一隻騰訊(700) 仲得，其餘科技股都唔掂，科技股同賭股唔同，並無特別負面消息，而且美國的納指同科技股仲創緊新高，但香港科技股話唔炒就唔炒，即使騰訊咁勁，亦比在美國上市的同業落後。去年當旺的是紅色股和地產股，我對今年的地產股有戒心，主要係加息年地產股有點壓力，但紅色股就例外，我估仲有得去，至少上半年是如此，主要因為中國經濟仲係衰，阿爺別無選擇，只有繼續放水托住個市。
你睇剛公佈的去年12月內地官方製造業採購經理指數跌至50.1，回落至50的盛衰分界線邊緣，差過市場預期，更創18個月以來新低，較11月的50.3回落0.2個百分點，主要受生產持續萎縮和新定單指數下跌拖累，顯示經濟仍在下行，阿爺真係想唔放鬆銀根都唔得。
咁睇好內地股市的主要風險在那裏？主要就是經濟回升。我估今年第一季內地經濟仍在尋底或低位略彈，到第二季有較明顯的好轉，若然如此，阿爺在上半年都要再放水，唔會收得太快，以免一縮經濟就唔得，所以上半年股市仍可以睇好。但萬一內地經濟復元得比想像中快，阿爺就會提早收水，但我估上半年出現此事的機會只有兩三成，風險不大，但都要小心留意。
順勢而買 睇實數據
我對未來A股的狀況，是樂觀中帶審慎。內地人睇市睇得好牛，上證綜指上年收報3234點，家內地睇5000點大有人在，話一個大牛市在前面。我雖然都睇係牛市，但就無睇得咁「大」，升到4000點有機會，若到5000點好誇，今年要升到呢個地步，要在資金好鬆、經濟又好好的情況下才會出現，但現實係如果經濟好番，我估資金會收番緊啲，因為內地仲做緊結構轉型，要消化過剩的產能，所以唔想資金太鬆，暫時銀根鬆和經濟好兩件事不會同時出現。上證綜指去年收報3234點，升24%就到4000點，要到5000點，要升54%，去年已大升53%，要連續兩年都升到咁癲，機會不太大。
我建議老師仍然持有的2823可以揸吓，等升高啲再食胡。上半年仍是炒紅色股的時候，紅色指數股有較大回吐時可以買啲，再上破高位有較佳回報時可以沽吓。唔好盲信股市一面倒向好，見到內地經濟數據逐步轉好時，就要小心。但買股票係咁，雖然話股票升完會跌永遠都啱，但唔好睇淡得太快，我估內地股市仲有一排升，你順住個勢去買啱啲。我估2015年，至少是上半年，都仲係炒作紅色股的年頭。
陸羽仁
金融High Tea 舊文