異動空間：首次落鑊環保股
新股炒法不外乎幾種，圍曬飛的話，掛牌即時狂升一兩個開再派貨；派到散曬的話，掛牌就急插潛水，震走曬散戶收齊貨再炒；第三種比較少，就係上市幾個月都橫行唔炒，悶走曬散戶，當貨源歸邊後再突然大棍砌上，魏力印象中有兩隻——中州證券（1375）、京能（579）。橫行其間踢極唔鬱，加上莊家暴力鎮壓，股價得番條線冇心跳。但當佢一開車，升勢將會雷霆萬鈞，壓都壓唔住，中州三個月狂飆近三倍，京能最多亦漲近兩倍，第三隻係粵豐環保（1381）。
粵豐主打做垃圾發電，先食正柴靜概念，垃圾日日有，唔似風電、光伏等受環境限制，焚燒垃圾之餘又可發電，符合「減量化、無害化、資源化」的原則，屬中央最大力推動的環保項目之一。
粵豐是廣東省第二大、中國第十一大垃圾焚燒發電企業，市場份額分別約13%及2%；為廣東省最大、中國第四大民營垃圾焚燒發電企業。十二五規劃確立優先採用垃圾焚燒技術，總投資逾千億元，粵豐除可享稅務優惠外，垃圾處理費及上網電價日後亦有望上調，為盈利增長動力。
魏力
http://www.facebook.com/2012jason
魏力
異動空間 - 魏力 舊文