金手指：香港樓市牛三
■香港樓市越升越有，最近升勢最勁是細價樓及舊樓。 資料圖片
美元強勢，呢個局令所有資產價格下滑。最勁，都只不過喺美元強勢下唔跌。例如，噚日全球好多媒體都話德國DAX指數破萬二點，開曬香檳咁。見咁開心，我走去㩒個圖，同歐元比，一年來DAX指數升百分之二十九，美元對歐元升咗百分之三十二，即係用美元，DAX其實係跌咗，遠跑輸升咗嘅恒指。真係齋睇啲頭條乜嘢「創歷史新高」，真係好易被誤導。
等有人用更高價接貨
所以，香港啲樓真係好勁，唔話福地都唔得。首先，唔可以將credit畀大陸同胞，因為一樣係靠大陸同胞錢外流嘅濠賭股板塊慘不忍睹。跟住又唔可以話貨幣政策配合，因美元強，即港元都強，仲要係因會加息。如果啲樓真係攞去三、四按，冇理由仲有金融機構夠膽借畀呢啲業主，如果真係有，真係為放錢畀呢啲金融機構做生意嘅債主們擔心。
睇美滙指數二十五年圖，上次有咁嘅升勢，就係由一九九七年中亞洲金融風暴開波後，一路去到二○○二年。即如果唔係有沙士，香港樓可能早啲見底。提一提大家，美滙指數喺九七年七月一日，同現水平差不多，都係之前六個月有大升勢先。
最勁係啲細價、舊樓。零售市道差，大陸唔放水，啲前線sales嘅收入一定跌，連帶後生仔女搵錢難咗，冇理由仲搬出來租劏房。仲要大陸冇水，一定影響近年推高租金回報嘅秘密引擎，即來港讀書，人數萬萬聲嘅大陸學生。佢哋就算繼續來，都要慳啲一間房屈蛇住多幾個人。
不過牛三就係咁，唔再睇資產生產力，淨係希望有人用更高價接貨。我諗，仲有好多人體驗緊二○○七年花旗銀行總裁Chuck Prince當年講嗰句：「音樂未停，就要舞照跳。我哋仲跳緊。」記得喺電影《希特拉的最後十二夜》，即全球網民成日惡搞配字幕嘅希特拉片中，有一幕係啲納粹高官搞晚會。跳得好開心之際，窗外忽然衝入蘇聯坦克。各位，來舞吧！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文