金融High Tea 2015年3月17日
智能概念
2015年03月17日
美國聯儲局今星期開會議息，美股上個星期跌定先，但港股昨日又係唔跟喎，指數低開後回勇，下午仲升過百點收市，港股可以咁叻，主要係內地股市連升第四日，滬市破位向上，收3449點，創超過五年半新高。
國務院總理李克強話，會保持經濟在合理區間運行。如果速度逼近區間下限，會加大定向調控力度，言論穩定市場信心，加上A股新股凍結資金陸續回流，成為利好因素。
國貨果然有運行
但睇真啲內地股市升2.3%，香港H股指數升0.9%，就知港股跟唔足內地。恒生H股指數基金(2828) 收119元，比高位125.1元仲有段距離，人哋A股創咗新高，就知港股因資金外流仍跑輸內地。
滬指重上3400，國貨果然有運行！恒生指數收報23949點，升126點；國企指數收報11813點，升101點，成交732億元。聯交所股權披露，匯控(005) 本月10日再遭行政總裁歐智華等於場內減持，成為藍籌少數下跌份子。上周末力托大市的中移動(941) 升2.7元，收102.6元，內地股市破頂，中資金融股勢續強。平保(2318) 收報86.35元，漲逾3%，為表現最叻藍籌，安碩A50中國(2823) 倒升0.3元，報12.64元。
個股方面，比較特別係李寧(2331) 與小米手環締造者華米科技，達成戰略協議合作，推出新一代智能跑鞋，並探索大數據健康領域。李寧今曾炒高6.6%，收市升咗3.5%。
合作計劃方面，李寧將中國跑者數據和測試數據，轉化為一系列獨特而創新的算法，由小米手環研發團隊實現到鞋底智能芯片中。智能芯片通過採集跑者運動數據，為跑者提供專業的指導。
阿爺話力拓科網業，A股互聯網金融板塊和體育概念股表現突出，相信真係催谷又或者炒作呢個概念的公司陸續有來。
九倉(004) 派成績表，去年多賺22%，達至359億元，數字睇落靚仔，不過核心盈利六年首跌，業績見光後，高盛發表報告，話業績差過預期，雖然維持「買入」評級，目標價就由72.8元降至70元。
九倉股價逆市下跌3%，收報50.75元，睇嚟有可能下試50元心理關口，呢個都反映做商場嘅股份短期難寄厚望。高盛報告指出，九倉核心淨利潤按年跌4%，低於高盛估計一成，因內地物業純利比估計差，稅前盈利按年下跌27%，同時須為內地物業減值20億元。
該行就讚九倉中港收租物業表現強勁，2014下半年收入按年升21%，當中香港零售及寫字樓收入喺2014下半年分別升18%及12%。
九倉揭示商場股弱勢
有中環茶友話，九倉早幾年喺內地加大房地產投資，成為帶動整系業績的火車頭，但呢兩年內地樓市開始放慢，聽聞九倉已經減輕喺內地投資。?家仲要留意內地旅客來港消費見頂回落趨勢會點。
茶友話，九倉係自由客政策的大贏家，令公司資產同盈利三級跳，不過，旅客湧入引起社會不滿，特區政府不斷推動橋頭經濟，?家機管局大力啟動機場商業區項目，估計下半年就會招標，首期計劃商場面積已經大過海港城。一般嚟講，商場至少要十年八載先成熟，機場商業區係咪成功係另一回事，商場樓面大增，對於租務條件超辣的九倉商場，會唔會構成競爭，係好值得關注。
當然，機場商業區由起好到招標，至少要幾年時間，無咁快會有實質衝擊，最緊要係市場心理係點。如果個市好旺，大家會當消息無料到，相反，就唔多唔少會有心理影響啦！
陸羽仁
金融High Tea 舊文