異動空間：跟股神思維落注
股神畢菲特一向係做刁能手，去年十一月股神斥資四十七億美元，向P&G收購金霸王電池業務，睇好消費電池前景毋庸置疑。香港都有隻電池股叫金山工業（040），市值僅八億元，魏力計過度過，覺得佢大有潛力喪炒，係時候落注！
金山工業旗下有兩家附屬公司，GP工業（持股84.7%）、GP電池（持股58.2%）。截至去年九月底金山工業純利四千五百萬元，兩家附屬就貢獻四千萬元，佔比近九成。去年兩公司中期業績狂升，GP工業增長72%，GP電池更飆升四十三倍，股價自去年六月以來分別急升40%及81%，最新市值達3.28億及1.64億美元，折合38.4億港元。計番比例，金山工業齋揸呢兩家公司已值廿九億元，而家市值係8.4億元，超級折讓達71%。太多數據消化唔切？一句講曬：金山工業家陣股價係三折有找！
秤資產冇得輸，睇業績今年亦係翻身之年，相信股神眼光的話，未來幾年都係光輝歲月，加上穩定派息墊底，相當吸引。由於資產折讓太大，不排除大股東將公司私有化，或趁殼價高昂直接賣盤，真係點做都得！
魏力
http://www.facebook.com/2012jason
魏力
異動空間 - 魏力 舊文