中環在線：牛一兼沽港交所勁賺
葉茂林派錢 耀才員工獲百萬
■葉茂林噚日切切嚇蛋糕心血來潮，大派利是。
耀才證券（1428）老闆葉茂林生日豪派100萬元畀員工！港股近日喺大成交下急升，證券行老闆必然笑逐顏開，葉老闆最近仲沽咗些少港交所（388）而勁賺6,000萬元，撞啱噚日係佢63歲牛一，就派100萬元畀員工，每人約袋3,000元，實行齊歡唱、同慶賀咁話！
葉老闆噚日自爆，大約兩個月前買入港交所股票，勢估唔到復活節長假之後，資金湧入，港股爆升，港交所前日仲喪升去到接近300元，佢前日就喺260元左右沽出些少港交所股票。
四叔娶新抱曾派萬元利是
睇番資料，兩個月前，港交所大約180元樓下，葉老闆喺260元沽，即係賺咗80大元，粗略計算，佢沽咗75萬股左右，咁就賺到6,000萬元嘞。葉老闆話前日只係「沽咗啲啲」，照咁講，佢𠵱家應該仲持有唔知幾多個億市值嘅港交所，賬面都發到豬頭咁喇。
難怪佢最近心情靚爆，噚日一班同事喺寫字樓同佢慶祝生日時，聞說佢係切切嚇蛋糕，忽然心血來潮，宣佈派100萬元畀員工。
耀才𠵱家有近300名員工，除開應該每人獲派3,000元。葉老闆講明，今次一視同仁，唔會偏心高層，反而屬意向前線員工派多啲。
其實葉茂林唔係第一個因喜慶事而向員工派錢嘅老闆，最經典肯定係恒基地產（012）主席李兆基（四叔）2006年娶徐子淇做新抱時，向恒地每名直屬員工爽派1萬元大利是。「玩具大王」蔡志明翌年嫁女亦向旗下旭日集團員工合共派出200萬元利是。
隨住港股係咁升，老闆派錢呢類消息唔知會否陸續有來呢？最緊要係「秋官效應」要失靈囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文