一周三件：中玻聞到炒味
■趙令歡任主席的中國玻璃，近日成交大增，明顯有資金落鑊。 資料圖片
祖國IT巨頭聯想控股嘅成員企業弘毅，有揸住17%權益嘅中軟（354），短短一個月，最高曾上到周一4.94元，翻咗一番，兼創埋8年新高。弘毅仲有揸股份，仲包括中國玻璃（3300），比起2011年高位4.82元，仲係累跌七成，兼有好高嘅可塑性。
股東粒粒皆星
弘毅家陣揸咗中玻22.8%，集團掌舵，正正係弘毅投資嘅總裁趙令歡。後邊弘毅，管理資金規模，超過460億元人仔，係大孖沙級數。而中玻喺去年11月，亦配股引資中建材（3323）對口嘅中建材集團，揸咗中玻近14.4%。後邊中建材集團，係阿爺點名首批進行改革嘅央企之一。
諗到嘅係，中玻有超級強勢股東同星級掌舵，下一步，係睇星閃閃股東，透過乜嘢方式，去將中玻湊大，至係中線嘅重點，中玻有好高嘅可塑性。而中玻家陣市值，得22億銀左右，又扣埋另一位大孖沙股東日本Nippon Sheet Glass揸中玻權益，真係街貨市值得8.8億元，好細奀。
而呢轉北水南渡，狂炒落後中資，場內行家洛陽玻璃（1108），由上月尾開車，家陣已經翻咗一番，PB炒到上48倍。祖國近磅行家亞瑪頓（深002623）2.6倍PB、旗濱（滬601636）2.7倍，股價半年亦講緊翻咗一番！
中玻又點？啱啱喺呢個月頭，亦即係半年底起步，半年同期先升得25%，PB仲係得0.7倍，平咗一大截之餘，升幅亦比起行家落後咗一大截！
最近四個交易日，中玻成交股數上升至千萬股水平，係最近一年最大成交幾日。趁有資金落鑊，先嚟轉快炒，當上番1倍PB計數，中玻幾乎要翻半番，上到1.78元，到時，中玻PB，仲未有耐追到祖國行家。
錢雋
細價股專家
本欄逢周二、三、五刊出
錢雋
一周三件 - 錢雋 舊文