魚樂無窮：大市回氣細價股尋寶
■雅天妮主席謝海州出掌後，公司動作多。 資料圖片
港股終於肯唞，港股通熱炒股如國美（493）、金山軟件（3888）、阿里影業（1060）全線回吐，但大市成交依然超過兩千億元，大漲小回格局。根據過往經驗，瘋狂牛市調整一日起兩日止，甚至即日完成，經常呻冇貨或唔夠貨嘅戰友，請好好把握機會了。
大股回氣，細價股靜靜起革命，廿大升幅榜中，清一色細價股或創業板股份。你睇半新股恒發洋參（911），只係將股份拆細，已經炒高一成，反映大市進入整固期，熱錢正式轉戰細價股。
今日嚟個華麗轉身，畀隻細細粒嘅雅天妮（789）大家參考，其實年初曾推介，簡單幾句講下背景︰創辦人謝超群已退下，謝超群弟謝海州接管，然後出現一連串動作︰供股、賣物業及配飾業務，予人鋪路賣殼之感，最新市值4億元左右，cash佔一半有多，殼股計屬極品級數。
翻查近期供股公司，均有脫胎換骨表現，英皇證券（717）、康宏金融（1019）現價分別較供股價高出兩倍及五倍，雅天妮僅錄七成升幅，突然變得好渺小。再講，英皇證券同康宏金融市值講緊幾十億，雅天妮只及其十分之一，好炒度達十粒星。
雅天妮噚日大成交突破雙頂阻力，新一輪升浪一觸即發，去番舊年高位0.345元，升幅以倍計，屆時剛好等於殼價。
唐牛
https://www.facebook.com/tongcow88
唐牛
魚樂無窮 - 唐牛 舊文