中環在線：累售6夥 丹麥柬埔寨人入市
OPUS買家無強國人？
■OPUS只得12夥，現時已售出一半。 資料圖片
太古地產（1972）旗下位於司徒拔道嘅OPUS HONG KONG傲璿自2012年推售以來，一直都係市場焦點，除咗因為外形獨特，最重要係每個單位都講緊3至5億元成交，項目
至今賣出6夥，6個買家分別來自柬埔寨、丹麥、台灣、香港，強國人反而唔多見影，唔係佔多數。
OPUS其實只得12夥，地下連一樓有兩個複式單位，以上都係一層一夥。佢哋最近就以接近5億元賣出一個複式單位，呎價去到9.6萬元，成為亞洲分層物業最高紀錄，買家身份近日曝光。
土地註冊處資料顯示，呢個複式單位嘅買家透過Lead Connection Ltd公司名義登記購入，公司董事Aaxman Daniel，佢持有丹麥護照，登記住址位於瑞士Schindellegi。
翻查資料，OPUS嘅買家身份都幾多元化，2樓單位由兩位柬埔寨背景人士買入；一個高層單位嘅買家叫何霖，有傳佢係來自台灣嘅廠家、地產界稱為「台灣張」張彥緒嘅太太。
另外兩個單位嘅買家英文名串法，就似係香港人；惟獨有一夥由公司名義購入，真係估唔到係何許人。
太地售樓先查買家背景
聞說，太古地產推售呢個樓盤都唔係淨係價高者得，好似都會了解一下買家背景先至落槌。
有代理亦都話，由於呢個盤嘅設計獨特，並非四四正正，都唔係咁多強國人like，中國人始終鍾意屋企四四方方，方便擺傢俬咁話喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文