陸羽仁 BLOG 2015年7月28日
口術無用
2015/07/28 09:13:23
網誌分類: 經濟
歐美股市受內地股市暴跌拖累，昨日收跌，杜指跌128點，收報17441點，跌0.7%；標普500指數跌12點，收市報2068點；納指跌49點至5040點，三大指數跌幅由0.6%至1%不等。歐洲股市跌得勁啲，德國
及法國股市齊跌超過2.5%。
又係黑色星期一！內地股市昨日最次出現股災，上證綜指重挫8.5%，係2007年以來最大的單日跌幅。上證綜指昨日早段仍好好哋，在4000點附近橫行，但下午有內地媒體猜測「國家隊」已經撤出市場，不再救市的消息，即時令到大市直線跳水，接連失守3900、3800兩個關口，下滑253點，上海深圳兩市有接近2000股跌停。同時，期貨大面積暴跌，中證500、滬深300期指主力合約全線跌停，上證50主力合約跌超9%。
昨日內地跌得最勁嘅係金融、資源等藍籌股，前期係國家隊護盤主力的兩桶油，中石油重跌，中石化更係跌停板。由於藍籌股在中央救市轉買中小股後沒有反彈陰陰跌，如今再度暴跌，反映有大量資金正撤出市場。有傳媒報導，昨日下午流出市場的資金就達到2.3萬億元。
大市依家全靠中央頂住，市場一旦聽到中央可能退市的傳言，投資者驚到腳軟。而家近月底海外的A50期指結算，早前大跌市唔少沽家沽咗海外A50期指，借退市呢啲流言插吓內地股市好正路，只要中央唔頂，可以無底深跌。
中央昨晚馬上作出澄清，指退市的傳言「完全不符合事實」，證監會新聞發言人張曉軍在夜間發布的自問自答中表示，「將繼續把穩定市場、穩定人心、防範系統性風險作為工作目標，全力做好相關工作。中國證券金融公司沒有退出，並將擇機增持，繼續發揮好穩定市場的職能。」又話證監會正組織力量對有關線索進行核查，一經查實，將嚴厲懲處。中證監更在新聞稿登埋舉報電話。昨日，內地就有包括西南證券等9家公司公告公司股東或實際控制人遭中國證監會立案調查。
散戶騰曬雞，而分析界仲比較樂觀，認為中央為咗回復市場信心，會不計成本，大手筆救市。內地南方基金首席策略分析師楊德龍預計，短期內市場將會是大幅震蕩的走勢，今日係非常關鍵的日子。為了防止市場跌破救市前的最低點，國家救市資金或許會大量買入。楊德龍認為，內地股市自6月中旬以來的調整，其實係殺估值的過程。創業板從140倍調整至目前的90倍，中小板從84倍調整至54倍，全部A股從29倍調整至20倍。
至於港股，美股唔得，已經先跌，港股就無跌太深。恆指昨日昨低開跌穿25000點水平，上午跌700幾點，下午一度跌到846點咁多，跌幅3.4%，低見24282點，臨收市跌幅略為收窄，跌776點，跌幅3.1%。與內地股市比較有關係嘅國指，自然跌得傷一些，昨日跌3.8%至11230點。大市成交顯著增加至1162億元，較上日大幅增加四成八。要留意嘅係恆指再度跌穿250天牛熊分界線，危危哋。
我覺得試過上一鑊阿爺入市後，外資都對內地大跌都較審慎，唔敢大力追沽，怕阿爺一出手又被挾死，這就是昨日內地下午深跌而港股無再瘋跌過千點的原因。我覺得阿爺在大跌市應該會再出手，但何時出手係一個問題，上次佢都係出咗兩日口術至出重金入市，若然今次又係咁，初時只出無用的口術，無出重金，咁跌多一日半日都可以好傷，所以入市撈貨若遇上阿爺反應遲鈍，就唔係幾好受啦。
陸羽仁
回應(8) 我想回應
陸羽仁 BLOG 舊文