魚樂無窮：環保股滄海遺珠
■花旗及瑞信齊唱好環保及新能源股。 資料圖片
大行花旗及瑞信齊齊發功，唱好環保及新能源股，令板塊成為跌市亮點。周一推介風電股金風科技（2208）乘勢炒起，單日升近一成，成交大增3倍，動力幾何級數上升，坐定定，16蚊目標價近在咫尺。
五中全會月底舉行，十三五
規劃成為焦點，環保板塊肯定翻炒再翻炒，今日推介嘅粵豐環保（1381），今浪只係打橫行，完全冇升過，一旦獲資金相中，爆發力可以大到你唔信，有買趁手。
粵豐乃廣東第二大垃圾發電企業，市佔率達13%，全國計亦達2%，截至6月底止中期盈利按年減少13%至1億。「又話廣東二哥，業績咁曳嘅？」睇真啲，盈利減少只因退稅收入減少，撇除上述因素，盈利依然有增長。事實上，公司近數月併購頻頻，包括以7,330萬人仔收購來賓中科環保電力，及以2.2億人仔買入湛江粵豐餘下45%股權，未來盈利增長動力有增無減，現價市盈率25.8倍，有望進一步下調。
粵豐去年底上市，招股價2.33元，大時代曾高見4.85元，昨收3.28元，仍然浮水一大截，雖然股價翻波，但根據CCASS資料，首十大券商持貨96%，手貨冇散到，有心人要舞起話都冇咁易，一旦突破3.5元阻力，見4字頭冇難度，屆時同瑞信目標價5.6元比仍有一段距離。
唐牛
https://www.facebook.com/tongcow88
唐牛
魚樂無窮 - 唐牛 舊文