中環在線：小飛俠fb話別 林家亨跳槽
投資界愁與樂
正如港交所（388）行政總裁李小加話齋，「有公司今天開，今天關，很正常」，雖然渣打集團（2888）決定結束窩輪及股票衍生工具部門，令唔少人忽然失業，但係喺另一邊廂，又有證券行開張，恒發洋參（911）老闆楊永仁私人揸住嘅恒發金融今
日就正式開幕，仲請到股評人林家亨過檔。
洋參大王證券行今開張
負責渣打窩輪及股票衍生工具部嘅翁世權與林燕玲（人稱小飛俠）噚日分別喺自己facebook確認離職，小飛俠話：「我離開渣打了。小飛俠嚟緊飛去邊？遲下話畀大家知。」有人留言叫佢做番主播，市場都估佢不愁出路。
而另一邊廂，確係有新證券開張。早前證監會資料顯示，恒發洋參老闆、「洋參大王」楊永仁私人揸住嘅恒發金融獲發俗稱1號牌嘅「證券交易」牌照。恒發金融今日就正式舉行開幕酒會，總行喺上環中遠大廈，唔少股評人都收到請柬。
講起股評人，楊永仁深明股評人對證券行嘅重要性，所以佢專誠向立法會議員張華峰旗下恒豐證券挖角，請咗佢哋證券研究部董事林家亨過檔。
林家亨解釋，離開除咗想向高難度挑戰，另一個原因，係楊老闆會畀恒發金融嘅認股權畀佢，意味恒發金融長遠打算上市。公司目前主力搵緊經紀。
講番今日開幕禮，林家亨竟然請到前老闆張華峰出席捧場，自己手下過檔，仲去幫人剪綵，張華峰呢啲真係有氣量嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文