金手指：
拯救一國兩制
■曾鈺成於日前與王振民的筆戰中，問到香港點解「回歸不到20年便走了樣」？ 資料圖片
大家都知孫柏文一路對香港物業投資極度留意，所以呢期都有追開中聯辦新任法律部長、清華大學法律學院長王振民同我哋立法會曾鈺成主席嘅筆戰。
王振民話「香港變得越來越不像香港」，而曾鈺
成就反問點解「回歸不到20年便走了樣」？
好明顯，兩位仁兄都冇睇我已提供嘅答案。所以今日再重申，香港應隨大英帝國末落，老早喺上世紀40年代「被回歸」。點知一場韓戰，國家要靠香港走私，繞過聯合國禁運令，發覺香港維持原狀（即域多利價值觀政策下嘅大英殖民地）原來可保佢哋嘅一黨專政，所以就保住我哋。
首要鞏固一黨專政
到78年後，又發覺有個咁嘅香港可以幫到改革開放，解除國力弱動搖一黨專政嘅威脅，所以小平同志就搞一國兩制保住我哋套管治模式。
不過個個都睇到，香港要保「域多利價值觀政策下嘅大英殖民地」制度最大嘅趨勢問題，就係香港越來越對中央冇用。或者更直接咁講，香港嗰套今時今日，已經不能再幫助中央鞏固「一黨專政」。
所以王振民同曾鈺成兩位老人家，你哋真心想香港重返「域多利價值觀政策下嘅大英殖民地」制度的話，跟住以下呢個大方向就可以。係乜？就係只要「一國兩制」能幫助「一黨專政」就得。
家陣對一黨專政嘅最大威脅，肯定係大陸銀行系統嘅呆壞賬，有如97年印尼蘇哈托政權咁，一嘢倒台。不過唔好話王振民同曾鈺成，連黃絲都要知，如果真普選能解決大陸銀行系統嘅呆壞賬問題，習近平甚至可以叫人大釋法，釋到連唔夠秤嘅黃之鋒都可以入閘選特首。
所以各位要謹記，當你見到「一國兩制」能鞏固「一黨專政」，就係大舉買香港樓之時。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com