中環在線：
滙豐大班唔講銀行業 只評論經濟
歐智華化身分析師
■歐智華（螢幕中）出席經濟論壇，對財金經濟數據分析，頭頭是道。 黃耀興攝
香港作為金融中心，每年都有好多經濟論壇、財經研討會舉行，華華都去唔少，平時聽到有人講「油價應該喺25美元至40美元上落，中國今年GDP有6.7%」
，十居其九都係經濟分析師預測經濟前景嘅對白，估唔到噚日講呢堆說話嘅，係滙豐控股（005）行政總裁歐智華（Stuart Gulliver）。
歐智華算係比較低調嘅滙豐大班，平時甚少在港高調現身，就算公佈業績，佢哋管理層都係透過電話會議解話，難得佢噚日抽空在港出席亞洲金融論壇，以為佢主要分析銀行業經營大環境，點知佢化身經濟分析師，油價、息口、中國經濟增長數據等市場關注嘅東西，佢都好熟書咁講一餐，大概因為滙控下月公佈業績，𠵱家相對敏感，講宏觀經濟最穩陣。
佢做銀行嘅，當然最關注美國息口走勢，佢估計，美國聯儲局舊年底加息一次後，今年有機會再加息2至3次。至於國際油價最近不斷下試低位，佢就預期，石油供應量增加，年內油價將會喺25美元至40美元徘徊，低油價對日本與歐洲國家有利。
逆市力撐內地經濟
一講到中國經濟，雖然𠵱家人人擔心中國經濟硬著陸，前景堪憂，但歐智華就勇字當頭，大力唱好內地經濟，估計今年內地GDP有6.7%，只會差過舊年少少，仲話「我覺得中國經濟增長係被低估咗，因服務業都冇計入GDP」。
佢如此睇好內地經濟，冇他嘅，因為滙控正大加拓展珠三角市場業務，仲打算未來3、4年為此聘請4,000人，咁當然要堅持睇好喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com