智取大市：
用一分鐘提升回報
■唔落場就唔會知自己面對股票時，有乜改極都改唔到嘅壞習慣。 資料圖片
之前講過股票贏家嘅條件，不過，唔少條件取決於天賦同性格，今期不如貼地啲，講嚇點樣減少損失或增加利潤。假如閣下自問勤力研究投資嘅話，恭喜你，起碼你已有改善嘅潛能。下一步，亦可能係唯一的一步
，就係了解自己。首先記住個「How」字，望嚇自己平時點樣揀股會贏，點樣揀股多數輸。如果閣下喺某種揀股模式下輸多贏少，最好唔買，即使忍唔住手都記住買少啲，記住早啲止蝕；如果某種情況買完多數會贏，就唔好輕易沽出或平倉離場，克服持貨恐懼，贏落去。另外，記住個「When」字，了解自己幾時手風順、幾時唔順。
「唔賭唔知時運高」，要了解自己，其實要喺唔同周期之中作戰，經過多番交易trial and error，因為唔落場就唔會知自己面對股票時，有乜改極都改唔到嘅壞習慣。事實上，最壞嘅習慣，就係只喺大時代先買股票，其餘時間不買不賣。
贏輸成績永遠最老實，就等如女仔照鏡，不是用來自我感覺良好，而係望嚇自己邊個角度最靚，了解自己，就知化妝、著衫，邊度要遮多啲，邊度要露多啲，成個人即刻靚咗至少10%。做到以上嘅事，本來每年輸得50%的，可能變成只輸得20%；本來輸20%的，可能變成打和；本來打和的，可能變成贏10%。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com