收市閒情：一帶一路維護和平
■人大委員長張德江「旋風式」訪港，將香港搞到天翻地覆。 資料圖片
人大委員長張德江「旋風式」訪港，將香港搞到天翻地覆後，只留低一句說話：「一帶一路可令世界和平。」然後香港人，就瘋狂揶揄委員長嘅金石良言。今次真係要為委員長講句「公道」說話！一帶一路對世界和
平嘅貢獻，未出發先興奮！
1、交通與交流。「一帶一路」講到明係中國向西發展嘅重要戰略，至於左派團體搞嘅「一帶一路」訪京團，大玩中港文化融合，巧妙將港式定義嘅「向西」帶返祖國。佘英輝同翁繼文「娼炮一聲」，搶先發揮香港喺呢項國策嘅貢獻，促進中港交流，推進向西戰略發展，拓展中國娼妓產業。KTV小姐有生意，黑幫開心笑，世界更美妙。
2、經濟發展。你碌卡買嘢買多咗，數又找唔到，拎住啲身外物又冇用時，你第一時間當然係諗住賣走佢，搵人幫你找數。即係咁，單係計今年第一季，假設中國GDP條數係堅嘅，偉大嘅祖國債務佔GDP至紀錄新高237%！237%係一個咩概念？即係中國每賺1蚊，就有多過2蚊係債。呢個時候你唔搵水魚幫你還，唔通自己啃呀？
於是「一帶一路」就以救世主嘅姿態現身，係咁幫啲國家仔修橋起路、大興土木，路路暢通。表面就冠冕堂皇地講，「我畀機會你哋參與中國故事」。嘩！真係好偉大呀！儍的嗎？大家做人咁多年，幾時聽過莊家講：「我係畀機會你哋贏錢，唔係為自己。」唔通真係都未搞掂自己經濟危機，就走去幫人咁偉大咩？實情係中國經濟再唔開源疏通債務，就真係一如成龍那句：中國的會＿＿！
所以你會見到國企不斷投標外國基建項目，唔會急，最緊要快，起咗先算。That"s why你會見到印尼高鐵項目，喺中標後只係4個月就開展工程。
大佬！全長150公里，一般要用18個月進行可行性研究，但中方用3個月就搞掂！最後項目動工一星期後就被叫停。
根據報道，2005至2015年呢十年間，中國喺「一帶一路」沿線國家投資嘅大型工程項目，就出現49個失敗個案，通常都係因為透明度不足，忽略當地環境與社會影響。
中國「走出去」政策搞亂人哋國家，你仲話可以幫到世界和平？閣下有所不知，中國去年《清廉印象指數》排名全球83，根據港府「一帶一路」網頁，「一帶一路」沿線有65個國家或地區，當中只有約四成國家，排名高過中國，其餘唔係衰過中國，就係細到連排名都冇。
當然以「一帶一路」之名，走出去起嘅基建最後未必起得成，不過，高層次嘅基建，當然撈到高層次嘅油水，由洽談到落實，關卡重重，你覺得班官賺唔到錢咩？賺到錢，黑錢世界繼續和平。
一帶一路，為你揭開黑色世界和平新一頁。
千頌C
http://www.facebook.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com