德江水暖鴨先知
2016年05月18日
港股今個星期在淡聲淡氣下連升兩日，而且回升幅度超過300點，有人就估係咪同領導人訪港有關，仲笑言股市係德江水暖鴨先知！
全靠重磅股夾上
呢排內地股市弱弱哋，外圍就炒上落，美股因為跌得多，前晚抽升番百幾點，但萬八點關口始終有阻力。本地經濟
狀況唔係咁靚仔，所以好多人打一句、問一句，都唔信股市會好，今個星期未開市前，大家仲估有可能試試萬九點，點知連續兩日個市都反彈，昨日彈番上兩萬點樓上。
個市咁樣反彈，有人認為係因為人大委員長張德江訪港，為了令氣氛好啲，所以個市炒上。呢個講法當然唔可以排除，但同一時間，大市成交唔多，無論推高或推低，需要嘅資金唔多，加上個市喺五月開市一直係咁插，插咗千幾點，借勢彈一彈唔出奇。
個市反彈，帶動大市回升嘅主要都係重磅股，火車頭仲係騰訊(700) ，仲有派息率較高嘅匯控(005) ，都係啲穩陣股份，顯示避險情緒仍然濃厚。呢排外圍好多大鱷，都開始揸番黃金，包括股神巴菲特透過投資公司增持全球最大金礦公司巴里克(Barrick)股權涉及2.64億美元，持股佔Barrick的股本約1.7%。另外，持有涉及105萬股SPDR黃金信託的認購期權。睇番金礦股個別都升番好多，招金由低位3.4元，彈番上7.2元，累積彈幅達111%。
喺本地金礦公司中，招金業務被視為較高，但佢表現始終同金價掛鈎。去年招金礦業(1818) 少賺21%，只有3.08億元人民幣，主要因為金價及銅價下跌，加上銷售下滑6.4%。雖然業績平平，但無礙招金股價累積反彈，主要係因為金價走勢強勁，當中金價從五年低位1061美元回升，家佢預期今年市盈率接近40倍，反映市場估計未來佢收入會改善，即係話後市金價仲有上升可能。
未來金價會唔會升，好大程度睇央行政策。金價自上任聯儲局主席伯南克退市開始回落，到今年開始反彈，主要係日本、歐洲經濟不斷轉弱，內地都變成低增長區域，家只係差美國仲有力頂吓，大鱷喺呢個時候增持黃金，似乎係博美國經濟都無以為繼，央行又要開水喉救市。從呢個角度睇，金價上升係經濟差嘅另一種表現。換句話講，金礦股升對股市而言未必係一個良好訊號。
個市回升，唔多唔少係因為冚淡倉，午後恒指收復兩萬點大關，一度飆262點，高見20145點，恒指收報20118點，升234點，國企指數收報8425點，漲113點，成交金額594億元。匯控與騰訊合力拉動恒指92點升幅，匯控收造49.2元，升2.61%；騰訊漲1.88%，造162.9元。
超購王有胡不妨食
騰訊今日會公佈第一季業績，摩根士丹利預期公司將錄得強勁表現，主要受網絡遊戲及廣告的強勁表現帶動。該行預期，騰訊首季收入將按年升38%、按季升1%至308億元人民幣。以業務劃分，大摩料騰訊手機遊戲收入將按年增長33%及按季增長6%，電腦網遊表現亦可能勝於同業。
廣告方面，大摩相信朋友圈的業務已進入增長最佳點，但對視頻廣告的看法謹慎，料至第二季才會重新增長加速。支付業務雖然今年農曆新年有380億元人民幣轉入微信錢包及財付通，但今年1月的銀行手續費達3億元人民幣，相信其後月份繼續增加，故首季利潤率受壓，毛利率或低於預期，由於佢累積升幅唔少，若然大市要回頭，都要小心佢會好消息沽貨。
超購二千倍成為超購王嘅服裝標籤及包裝印刷產品製造及銷售商HSSP(3626) 今早掛牌，於上市前夕暗盤走高。暗盤開市5分鐘報2.55元，較招股價1.36元，大幅升87.5%，如果有咁升幅，就算佢可能再升，都不妨諗吓食胡嘞。
陸羽仁
金融High Tea 舊文
來源 source: http://hdfin.stheadline.com