魚樂無窮：請搞好權益披露
■如投資者睇完股權披露，都只能靠估，又如何做好功課呢？ 資料圖片
上周提到旭日（393）有恒豐證券老闆張華峰加持，值得憧憬，原來只係一場美麗的誤會。事緣張老闆在本文出街後，於其facebook作出澄清，恒豐只為旭日供股的包銷商，他本人並非股份實際持有人，翻查
資料，其持股於5月中已由8.65%降至零，如文章令張老闆有所不便，唐牛在此講聲唔好意思。
雖然真相大白，但權益披露數據容易令人混淆，卻是不爭事實。還記得早些時候，為大孖沙增持股份計算身家時，當去到新地（016）時，便非常頭痛。無他，幾位大股東持股計算重複又重複之餘，持股最多的又是信託基金，關係錯綜複雜，最後要睇年報中的備註（只有幾point字那些），才能弄個清楚。
另外，權益披露中還有持股超過100%（多為計入CB後）的現象出現、長短倉變動等難題，凡夫俗子真係搞佢唔掂。
老老實實，如果股權披露操作模式還是十年如一日，投資者睇完都只能靠估，又如何做好功課呢？最終肯真金白銀落場嘅，只會越來越少，交易所與其埋首搞甚麼冷靜期呀、收市U盤等所謂利好股民措施，倒不如搞好權益披露，那便功德無量了！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com